Երեկ՝ հունվարի 10-ին, կրակոցներ են հնչել Շիրակի մարզում:
Ինչպես դեպքի վայրից News.armeniatv.com-ին հայտնում է ֆոտոլրագրող Գագիկ Շամշյանը՝ ժամը 16:30-ի սահմաններում, Արթիկ քաղաքի սրճարաններից մեկում հնչել են կրակոցներ:
Արթիկցիները ֆոտոլրագրողին պատմել են, որ Արթիկի Բաղրամյան և Աբովյան փողոցների խաչմերուկում, երբ իր ծառայությունն է կատարելիս եղել ոստիկանության Արթիկի բաժնի պարեկապահակային ծառայության դասակի ոստիկանության ավագ սերժանտ Լուկաշ Մինասյանը, նրան է մոտեցել Շիրակի մարզի Գետափ գյուղի բնակիչ Անուշավան Բաղդասարյանը՝ իր կողմից վարած Վազ 21 07 մակնիշի 03 ՕՏ 883 համարանիշի ավտոմեքենայով: Ա. Բաղդասարյանը Լ. Մինասյանին կանչել է զրույցի, սակայն ոստիկանը պատասխանել է, որ ինքը ծառայության մեջ է:
Ա. Բաղդասարյանը խաբեությամբ նրան նստեցրել է ավտոմեքենան, ապա մեքենան քշել է անհատ ձեռներեց Վահագն Քոչարյանին պատկանող սրճարանի ուղղությամբ: Հասնելով սրճարանի մոտ՝ նա ոստիկանության աշխատակցին խաբեությամբ մտցրել է նշված սրճարան ու արդեն սրճարանի առանձնասենյակներից մեկում Ա. Բաղդասարյանը և արդեն սրճարանում իր հետ գտնվող Շիրակի մարզի Գետափ գյուղի բնակիչներ Մհեր Խաչատրյանի և վերջինիս հորեղբայր Ավթանդիլ Խաչատրյանի հետ սկսել են հայհոյանքներ և սպառնալիքներ տեղալ ոստիկանության աշխատակցի հասցեին, ապա՝ ծեծի ենթարկել:
Սրճարանի մոտ հավաքվածները ֆոտոլրագրողին պատմել են, որ եթե «էդ միլիցեն իրեն ամրակցված հաշվեցուցակային «Մակարով» տեսակի ատրճանակից օդ չկրակեր, ապա էդ միլիցեն կամ հիվանդանոցում էր հայտնվելու, կամ ավելի բեթար օրն էր ընկնելու»:
Այս պահին նշված սրճարանում արդեն աշխատում են ոստիկանության քննչական գլխավոր վարչության Շիրակի մարզի քննչական բաժնի քննիչը, փորձագետը: Սրճարանում հայտնաբերվել և առգրավվել է կրակված 5 պարկուճ:
Այս պահին Արթիկ են ժամանել են նաև ոստիկանության քրեական հետախուզության գլխավոր վարչության ոստիկանության Շիրակի մարզային վարչության ոստիկանության 2-րդ սպայական գումարտակի և ոստիկանության հատուկ ջոկատայիններ: Փաստի առթիվ ոստիկանության քննչական գլխավոր վարչության Շիրակի մարզի քննչական բաժնում նյութեր են նախապատրաստվում:
Ֆոտոլրագրողը հայտնում է, որ, հավանաբար, գործով կզբաղվի Հայաստանի հատուկ քննչական ծառայությունը: Արթիկցիները նաև պատմել են, որ Ա. Բաղդասարյանը ԱԺ պատգամավար Շիրակի մարզի ԲՀԿ կուսակցության կառույցի ղեկավար Մարտուն Գրիգորյանի և նրա հոր`Կամոյի թիկնազորից է: Ա.
Բաղդասարյանի ավտոմեքենան դեպքի վայրից տեղափոխվել է ոստիկանության Արթիկի բաժնի տուգանային հրապարակ:
