Հիշում եք, ոստիկանի վրա կրակած տղաների պատմությունը: Նրանցից մեկը՝ անչափահասը, հենց նա էր կրակել սպանել Տիգրան Առաքելյանին, հոգեբուժարանում է, պետք է պարզվի դեպքի պահին նա մեղսունա՞կ է եղել, թե՝ ոչ: Երկրորդը՝ կալանավայրում է:
Վստահ եմ, հիշում եք նաեւ, որ տղաների մայրն էլ ժամանակին դատապարտված է եղել որդուն դանակահարելու համար: Այդ կինը եւս երկու անչափահաս երեխա ունի՝ մի աղջիկ ու մի տղա, որոնք սարսափելի դեպքից առաջ՝ շաբաթվա 5 օրը գիշերօթիկում էին լինում:
Տղաների կալանավորումից հետո, մայրը աղջկան ու տղային գիշերօթիկից տուն էր բերել: Տունը, այս դեպքում, շատ բարձր բառ է այն 4 պատի համար, որը ոչ կարգին դուռ ու պատուհան ունի, ոչ՝ ամուր տանիք:
Ինչեւէ, տունը չէ պատճառը, այլ ընտանի՛քը, որ համայնքը որոշեց միջամտել ու երեխաներին փրկելու կոչ-խնդրանքով բազմաթիվ նամակներ ուղարկեց իրավապահներին: Հիմա 12-ամյա աղջիկն ու 9-ամյա տղան Հայ օգնության ֆոնդի երեխաների աջակցության կենտրոնում են: Ժամանակավորապե՛ս:
Ինչ են անելու երեխաները՝ ՀՕՖ-ից հետո: Ինչ է լինելու նրանց ճակատագիրը՝ եթե հարեւանները ու նույնիսկ երեխաների տատը միաբերան պնդում են՝ անվտանգ չէ դեռահասների կյանքը մոր հետ նույն հարկի տակ:
Իսկ այսօրվանից հանրապետության բոլոր գիշերօթիկները փակվում են: Մնում է միայն մեկը՝ Գյումրու թիվ երկուսը, որն էլ կես տարուց է փակվելու:
