ڕاپۆرتی کەناڵی ئاسمانی پەیام...

پاش بەسەربردنی تەمەنێك لە خەبات و شۆڕش و تێكۆشان لە پێناو دین و ژینی میللەتەكەی و دوای ململانێێەكی زۆر لەگەڵ نەخۆشی ئێوارەی ٢٤ی نیسان حاجی سەعید پێنجوێنی كۆچی دوایی كرد.
سەعید كەریم حوسێن پێنجوێنی پێشمەرگەی دێرین ڕابوونی ئیسلامی بووەو لە سەرەتاكانی دەستپێكی شۆڕشی چەكداری ئیسلامی دژی ڕژێمی بەعس ماڵ و حاڵ و ژیانی تایبەتی خۆی چیدەهێڵیت و لە پێناو گەلەكەی چەكی خەبات دەكاتە شانی و لەگەڵ دەیان زانا و مامۆستای دیاری كورد پەیوەندی ئیسلامی دروستدەكەن و لەشكری قورئان دادەمەزرێنن.

هاوڕێ و هاوسەنگەرانی بە دڵێكی پڕ لە حوزن و چاوی فرمێسكیانەوە باسی ژیانی پڕ سەروەری حاجی سەعید پپێنجوێنی دەكەن، كە كێوێك بووە لە خۆراگری و ئازایەتی و فیداكاری.


حاجی سەعید پێنجوێنی لە ساڵی ١٩٤٦ لە دایك بووەو لە ساڵی ١٩٨٥ ڕوودەكاتە شاخەكانی هەرێمی كوردستان و یەكێك بووە ئەندامی مەفرەزە سەرەتاییەكانی پەیوەندی ئیسلامی، دواتریش لە ساڵی ١٩٨٧ بەشداری دامەزراندنی بزووتنەوەی ئیسلامی دەكات و لە كاتی كیمیایی بارانكردنی هەڵەبجە لە ١٦ی ئازاری ١٩٨٨ یەكیك دەبێت لەو پێشمەرگانە كە دەچێتە هەڵەبجە و بەشداری كۆكردنەوەی تەرمی شەهیدانی هەڵەبجە دەكات، هەروەها لە ڕاپەڕینە مەزنەكەی بەهاری ١٩٩١ی گەلی كورد ڕۆڵی بەرچاوی هەبووە.
لە دوای ڕاگەیاندنی كۆمەڵی ئیسلامی كوردستان لە ٣١ی ئایاری ٢٠٠١ ژیانی خەبات و تێكۆشان و بانگەواز و پەروەردەی لە نێو ڕیزەكانی كۆمەڵی ئیسلامی درێژە پێدەدات، سەرەنجام پاش ململانێیەكی سەخت لەگەڵ نەخۆشی و لە تەمەنی ٧٣ ساڵی گیانی سپارد، لە مەڕاسیمێكی شایستەدا و بە ئامادەبوونی ئەندام و كادر و بەرپرسانی باڵای كۆمەڵی ئیسلامی لە گۆڕستانی قڕگەی كۆن بەخاك سپێردرا.

свернуть