Қазақстан мен Америка арасында дипломатиялық байланыс орнағанына 26 жыл болды.
Осы аралықта Астана мен Вашингтон расымен сенімді серіктеске айналды. Өзара сауда-саттық былтырдың өзінде 1 млрд доллардан асқан. Ал ширек ғасырда біздің экономикаға тартылған инвестиция көлемі 30 млрд доллар шамасында. Екі ел әріптестігіне негіз болған салалар көп.
Жалпы АҚШ – еліміздің тәуелсіздігін алғаш мойындаған мемлекеттердің бірі. Қазір Қазақстан экономикасындағы ең ірі инвесторлардың қатарында. Соңғы 12 жылдың өзінде біздің елге шамамен 30 млрд доллар көлемінде инвестиция құйған.
АҚШ пен Қазақстан арасындағы экономикалық байланыс тәуелсіздіктің алғашқы жылдарынан бастап орнаған. Қос ел арасындағы ынтымақтастықтың іргетасы Елбасы Нұрсұлтан Назарбаевтың 1992 жылдың мамыр айында АҚШ-қа бірінші ресми сапары барысында қаланды.
Ал 1997 жылы экономикалық серіктестік туралы Хартияға қол қойылды. Қазақстанның сауда және инвестициялық жобалар бойынша маңызды геостратегиялық әріптес екені атап өтілді. Содан бері екі ел арасындағы ынтымақтастық тек нығая түскен. Елімізде америкалық капиталдың қатысуымен 500-дей компания жұмыс істесе, олардың 140-тан астамы – бірлескен кәсіпорын.
Ұлттық экономика министрлігі статистика комитетінің мәліметінше, олардың 444-і – кіші, 26-сы – орта, 37-сі – ірі кәсіпорын. Қазақстан экономикасына құйылған америкалық инвестиция негізінен тау-кен өнеркәсібі, жылжымайтын мүлік, қаржы және кәсіби ұйымдар, сондай-ақ қауымдастықтар мен бірлестіктер сияқты салаларды қамтиды.
