Շարունակվում է պտղի մահվան կամ անհետացման մութ պատմությունը: Այս անորոշության կծիկը բացելու համար զրուցեցինք դեպքի մասնակից բոլոր կողմերի հետ: Հայկուհի Խաչատրյանը պնդում է, երեխան ծնվել է, բայց իրեն չեն տվել, այլ վաճառել են, հիվանդանոցում այս վարկածը դետեկտիվ պատմություն են համարում:
Ալինան այն մանկաբարձուհին է, որը Հայկուհի Խաչատրյանի երրորդ երեխայի ծնունդն է ընդունել: Բժիշկ-գործընկերները չգիտեին, որ իրենց գործընկերուհին ազատվել է աշխատանքից, սկզբում նշում էին, որ միայն այդ օրը չի եկել, հետո ասում, որ մի քանի օր է, աշխատանքի չի գալիս, ի վերջո պարզվեց՝ Ալինան ազատված է: Մեր նկարահանման օրը հիվանդանոցում չէր նաև բժիշկը՝ Ռուզաննա Քեհյանը: Տեղեկացրին, որ ազգականը վատ է զգացել, բժշկուհին գնացել է: Հաջորդ օրը բժիշկը զանգեց և տվեց իր փաստաբանի հեռախոսահամարը: Կարեն Հակոբյանի խոսքով՝ երեխա չի ծնվել, պտուղը մահացած է եղել:
Հայկուհի Խաչատրյանը նշում է, որ չի հավատում, թե երեխան մահացել է, քանի որ մարմինը չի տեսել: Ասում է, որ իրեն և քրոջը 1 մլն դրամ են առաջարկել երեխայի համար: Հայկուհու քույրը պնդում է, թե օրգաններ է տեսել մարմինների պահման սառնարանում:
Ավելի ուշ հիվանդանոցում ծնողներին հայտնել են, որ պտուղը Իսակովի դատափորձաքննական լաբորատորիայում է:
Հայկուհի Խաչատրյանը նշում է, որ իրեն 4 օր տվել են հորմոնալ դեղահաբի 6 կոճակ: Այդ պատճառով էլ, համոզված է նա՝ վերակենդանացման բաժանմունքում է հայտնվել: Հաջողվեց կապ հաստատել նաև մանկաբարձ Ալինա Մեսրոպյանի հետ: Պարզվեց մանկաբարձն ինքն է դուրս եկել աշխատանքից, քանի որ, իր խոսքով հոգեպես ծանր վիճակում է: Նա նշում է, դեղերը, որոնք ընդունել է Հայկուհի Խաչատրյանը, տալիս են այն դեպքում, երբ պետք է մոր օրգանիզմում կաթ չարտադրվի:
Թե ինչ է տեղի ունեցել մի քանի րոպեի ընթացքում կպարզի քննությունը: Փաստաբանների պալատի անդամ Տիգրան Գրիգորյանը ներկայացնում է խնդրի իրավական կողմը: Եթե նոր ծնված երեխան մահանում է, ըստ օրենքի ծնողը կամ օրինական ներկայացուցիչը պետք է անպայման տեղեկանա և փաստաթուղթ ստորագրի:
Բժշկական սխալի կասկածով հարուցված է քրեական գործ : Կատարվում է քննություն:
