Ацы аз Дзæуджыхъæуы базарадон-экономикон техникумыл æххæст кæны сæдæ азы. Уæдæй абонмæ ахуыргæнæндон рауагъта æцæг дæсныты. Юбилейы фæдыл мадзæлттæ ахуыргæнæндоны арæзт цæудзысты октябры онг. Æдæппæтæй 17 мадзалы. Ацы бонты суазæг кодтой сæ курдиатджын æмæ номдзыд рауагъдонты. Се 'хсæн Ирыстоны аивадæн бирæ азтæ чи балæвар кодта, ахæм адæм. Бæрæгбоны уыд нæ уацхæссæг Дзæдзойты Фатимæ дæр.
Дзæуджыхъæуы базарадон-экономикон техникумæй сæдæ азмæ рацыди мингай фæсивæд уæйгæнæг, хæринаггæнæг, бухгалтер, кондитер æмæ технологы дæсныйæдтимæ. Фæлæ хъысмæт хаттæй-хатт цæхгæрмæ фæзилы, æмæ, зæгъæм, хæринаггæнæджы дæсныйад кæмæ ис, уый свæййы аив дзырды кæнæ кафт æмæ зарды дæсны. Афтæ Уæрæсейы Федерацийы культурæйы сгуыхт кусæг, нæ республикæйы адæмон артисткæ Кокойты Аллæ дæр. Каст фæци Дзæуджыхъæуы базарадон техникум.
Æмæ дзæгъæлы нæ! Аллæ йæ ирон уæздан фæндырдзагъдæй адæмы зæрдæтæм ссардта рæсугъд фæндаг.
Дзæуджыхъæуы базарадон-экономикон техникум абон æрбамбырд кодта йæ рауагъдонты курдиатджындæрты, йæ цардвæндаг аивадимæ чи сбаста, уыдоны. Се 'хсæн Илурты Риммæ, Артур Халатов, Езеты Игорь, Кочиты Георгий.
Уазджытæ аныхас кодтой æрыгон фæсивæдимæ, дзуапп сын радтой сæ фарстатæн. Æрымысыдысты сæ ахуыры азтæ æмæ уарзон ахуыргæнджыты. Уыдон та сæм сæ салам æрбарвыстой видеоæрмæджыты руаджы.
Дарддæр та æнусон юбилейы фæлгæты техникум æрбамбырд кæндзæн, йæ царды фылдæр хай ацы ахуыргæнæндонæн чи балæвар кодта, уыцы кадджын ахуыргæнджыты. Абоны ахуырдзаутæ æмæ кусджытæ сæ сты бузныг, ныры фæлтæрæн сты дæнцæг хæссинаг æмæ сæ сты сæрбæрзонд. Кæронбæттæн мадзал ацæудзæн 22-æм октябры. Уыцы бон 1921-æм азы фыццаг хатт йæ дуæрттæ байгом кодта Дзæуджыхъæуы базарадон-экономикон техникум.
_________________________
Мы рядом в:
vk.com/irystontv
instagram.com/irystontv
youtube.com/irystontv
twitter.com/irystontv
ok.ru/irystontv
