#demədidemə #mədəaltıvəz #sağlamlıq
#kəşfettt #xalqtəbabəti #mədə

Mədəaltı vəzi elə bir orqandır ki, fəaliyyəti pozulanda sağlamlıq, sözün əsl mənasında, yoxa çıxır.
Bu orqanın vəziyyətinə nəzarət etmək niyə bu qədər vacibdir?
Mədəaltı vəzi xəstəliklərinin orqanizmə təhlükələri nələrdir?
Videoda bu sualların cavabını tapa biləcəksiniz...

Mədəaltı vəzi qarın boşluğunda-mədənin arxasında, sol böyrəyin yanında, iki arxa fəqərə arasında yerləşir. Uzun, əyri formaya malikdir, baş, gövdə və quyruqdan ibarətdir. Vəzi bədəndə çox vacib funksiyanı yerinə yetirir. Nazik bağırsaqda zülalların, yağların və karbohidratların mənimsənilməsində iştirak edən fermentlər istehsal edir. Həmçinin, qanda şəkərin səviyyəsini tənzimləyən hormonu-insulini istehsal etmək də mədəaltı vəzinin vəzifələrindəndir.
Mədəaltı vəzinin patologiyaları ciddi həzm pozğunluqlarına, diabetin inkişafına, digər təhlükəli xəstəliklərin yaranmasına səbəb olur. Orqanda problem olmasının ilk işarəti qarının yuxarı hissəsində və ya sol böyürdə ağrının mövcudluğudur. Orqanizmin ümumi sağlamlığı naminə mədəaltı vəzinin vəziyyətinə nəzarət etmək, vaxtlı-vaxtında tibbi müayinələrdən keçmək lazımdır.

Mədəaltı vəzi xəstəliklərinin ilkin əlamətləri.

Mədəaltı vəzinin xəstəliklərinin simptomları xəstəliyin növündən və irəliləmə mərhələsindən asılıdır. Bununla belə, bəzi əlamətlər orqanın “həyəcan siqnalı” sayıla bilər:
I. Küt ağrı. Həm kəskin, həm də xroniki xəstəliklərdə hiss edilən aşağı intensivlikli, tədricən artan ağrıdır. Tez-tez təkrarlanması mədəaltı vəzinin atrofiyası zamanı, həmçinin, xroniki pankreatitin son mərhələlərində müşahidə olunur. Ağrı bir çox mədəaltı vəzi xəstəliklərinin xəbərçisidir. Ağrının episentri sol qabırğanın və epiqastral nahiyənin altındadır. Bəzi hallarda arxasıüstə uzandıqda ağrı qurşağa gəlir və güclənir. Qadınlarda və kişilərdə mədəaltı vəzinin quruluşu, yeri eyni olduğundan simptomları da eyni olur.
II. Kəskin ağrı. Mədəaltı vəzində kəskin ağrı şişin və zədə səbəbiylə başlayan iltihablanmanın fonunda baş verə bilər. Kəskin və xroniki pankreatitdə iltihabi proses irəliləyir. Bu xəstəliklərdə ağrı sindromu fermentlərin və mədəaltı vəzi şirəsinin qida əvəzinə öz toxumalarını həzm etməyə başlaması ilə əlaqədardır. Əksərən, kəskin ağrı sol böyürdə baş qaldırır və mədənin aşağısını, qurşağı, beli əhatə edir. Belə ağrı, adətən, kəskin pankreatitin və xroniki pankreatitin kəskinləşməsi ilə baş verir. Bundan əlavə, alkoqol və yağlı qidalar da ağrını kəskinləşdirə bilir. Pankreatit zamanı ağrı intensiv olur; ağrıkəsicilər və spazmolitiklər qəbul etdikdən sonra belə, azalmır. Ancaq gövdənizi irəli əysəniz və ya qarının yuxarı hissəsinə soyuq bir şey qoysanız, ağrı zəifləyər.
III. Ürəkbulanma, qusma və yanma ilə müşayiət olunan ağrı. Qarın əzələlərində şiddətli ağrı və gərginliklə birlikdə təkrarlanan qusma kəskin pankreatitin əlamətidir. Qarın ağrısı, bədən temperaturunun yüksəlməsi, öd suyu və qanla qarışıq qusuntu pankreanekroz zamanı baş verir. İntensivliyi tədricən azalan ağrı, qarın ağrısı, qurşaqda ağrı, kürək ağrısı kəskin pankreatitin xəbərçiləridir. Mədəaltı vəzinin toxumasının zədələnməsi nə qədər güclüdürsə, ağrı bir o qədər kəskindir. Zaman keçdikcə, patoloji proses vəzidə sinir uclarının ölümünə gətirib çıxarır. Nəticədə, ağrının şiddəti azalır. Bu, heç də müsbət hal kimi dəyərləndirilməməlidir. Əksinə, tədricən azalan ağrı mənfi əlamətdir. İntoksikasiya ilə paralel baş verən ağrı xroniki pankreatitin, mədəaltı vəzinin xərçəngi kimi xəstəliklərin kəskinləşməsi, yəni son mərhələyə çatması ilə əlaqədardır. Unutmayın, mədəaltı vəzinin xəstəliklərinin əksəriyyəti asemptomatikdir-müəyyən bir nöqtəyə qədər heç bir şəkildə özünü göstərmir.
IV. Baş ağrısı. Mədəaltı vəzi ilə bağlı müəyyən problemləri olan insanlarda tez-tez baş ağrıları və miqren tutmaları baş verə bilir, diqqətsizlik və konsentrasiya ilə bağlı problemlər yaranır.
V. Yüksək temperatur. Xəstələrin 2/3-sindən çoxunda yüksək bədən temperaturu müşahidə olunur. Mədəaltı vəzində inkişaf edən iltihabi proseslər, adətən, yüngül qızdırma yaradır. Əksər hallarda, bu, 380C-dən çox olmur. Ancaq pankreatitin iltihabı zamanı bu göstərici yüksələ bilər.
VI. Çəki itirmək. Mədəaltı vəzinin düzgün işləməməsi bədən çəkisinə təsir edir, həmçinin, iştahın azalmasına gətirib çıxarır. Orqanın ciddi patologiyaları zamanı bədənin qida maddələrini almasına maneə yaradan hormonlar istehsal olunmağa başlayır.

свернуть