Հնչում է հատուած Վագների «Թանհոյզեր» ոպերայի նախանուագից

ԼԵԶՈՒ ՀԱՅՈՑ

Սուրբ տաճար մաքրութեան ու լոյսի,
լոյս մարմին դու հոգու սքանչացման,
ոգեղէն վես ամրոց անխորտակ,
ամրակուռ ու անխախտ յաւրինուածք...
Մեր մտքի ու սրտի մէջ մխրճուած՝
դու բիւրեղ բիւրացոլք ու զնգուն,
Քեզնով է աշխարհը համակուած,
Եւ աշխարհը քեզնով է կանգուն...


Դու քո փրկչական յարակայութեամբ
մեր ճանապարհի անդունդներին ես կամրջուել շքեղ։
Քո միաւորող, խաւարահալած շողերից ամուր կառչելու ենք դեռ։
Քեզ պաշտպանելու համար ենք դարձեալ մարտի նետուելու,
գալիք բոլոր մեր շրջադարձերում քեզ ենք վերստին ապաւինելու...
Ժամանակամերժ քո խորհուրդն է մեզ
ամենակուլ այս ճահճի խորքերից կրկին հանելու...
Քեզ փարոսի պէս վառելու համար
Սուրբ Տեսանողին հրէ նշաններ տրուեցին վերից,
որոնց սրբազան ոլորքներն ի վեր
դարերը իրենց պատմութիւնները ընդելուզեցին...
Մթին դարերի ծովերով խաւար,
Մեղապարտ որդուդ առաջնորդութեամբ,
մետաղահանդերձ նշաններն անդուղ թիավարեցին
ու չընկրկեցին գոյութեան դժնի պատերազմներում։
Դու անցար բոլոր ծովերը արեան,
ովկիանոսները հալածանքների,
բայց հարստացած՝ բոլոր ափերում խարիսխ ձգեցիր։

Հիմա հասել է պահը սրբազան՝
վերամբարձ թեւեր մեզ յաւրինելու
ու շնորհելու քո լայնատարած թեւաբացուածքին
նոր անկրկնելի թռիչք արծուենի,
Որ էլ չուշանայ մեր ձգտումների ժամն աստեղային,
Մեր ժամանմանը դեռ սպասում է հրեղէն ոգին,
Մաքառման երկար մեր ճանապարհին
Իցի՜ւ արժանի դառնանք հրաշունչ նրա համբոյրին...

свернуть