Հին ռեժիմի պարագլուխներին մեկուսացնելու և դիմադրությունը ջախջախելու համար կարելի է ժողովրդի պարտադրանքով ուղիղ ժողովրդավարության մեթոդներից օգտվել, լուծարել Ազգային ժողովը, ձևավորել հեղափոխական ուժերի ներկայացուցիչներից արտակարգ լիազորություններ ունեցող կառավարություն:
Այս մասին սեպտեմբերի 15-ին լրագրողների հետ հանդիպման ժամանակ նշեց «Սասնա Ծռեր» խմբավորման խոսնակ Վարուժան Ավետիսյանը:
Ըստ նրա՝ կարճ ժամանակով ձևավորված հեղափոխական ուժերի ներկայացուցիչների՝ արտակարգ լիազորություններ ունեցող կառավարությունը պետք է ունենա նաև օրենսդիր լիազորություններ;
Վ. Ավետիսյանի խոսքերով՝ վերոնշյալ փուլերն անցնելուց հետո պետք է շատ արագ կատարել անհրաժեշտ բոլոր փոփոխությունները, որոնք կնպաստեն երկու գլխավոր խնդրի լուծմանը.
Առաջինը՝ մաքրել երկիրը ռեժիմի մնացորդներից ու կոռուպցիայից, երկրորդ՝ ապահովել ազատ, արդար ընտրություններ:
«Մենք շատ վտանգավոր ճանապարհի վրա ենք հիմա կանգնած, եթե շարունակենք կառչած մնալ հին համակարգի ակտերից ու կադրերից: Երեկ Մարտունու ենթաշրջանում էինք, զանգվածաբար մարդիկ բողոքում էին, որ ոչինչ չի փոխվել, նույն պաշտոնյաններն են մնացել, ոչ մի առաջընթաց չկա»,- նկատեց բանախոսը:
Վերջինիս փոխանցմամբ՝ քաղաքացիների դժգոհություններին կարելի է հակադարձել՝ ասելով, «Ժողովուրդը թող տեր կանգնի իր իրավունքներին, տեղական իշխանիկներին վռնդի, բայց հիշենք, որ այդ նույն ժողովուրդը սահմանափակված է սեժիկական սահմանադրությամբ ու օրենքներով»:
«Սասնա Ծռեր» խմբավորման խոսնակի կարծիքով՝ ներկա իրավիճակում չկա հեղափոխության հայեցակարգ, չկա արժեքային համակարգ, մինչդեռ դրանք բոլորը ժողովրդավարությանը վերաբերող տարրեր են:
«Նման իրավիճակում աշխարհը փորձ ունի, կա անցումային ժողովրդավարություն իր կոշտ կառավարման էլեմենտով, որը միակ հնարավորությունն է ապագայում ապահովել ժողովրդավարությունը՝ չանցնելով իրավունքի սահմանները»,- փաստեց Վ. Ավետիսյանը:
Վերջինս, պատասխանելով լրագրողի այն հարցին, թե արդյոք աջակցում են վարչապետ Նիկոլ Փաշինյանին, ընդգծեց, որ այո՛ աջակցում են երկու տարբերակով՝ նախ թույլ չտալով, որ հարվածներ հասցնեն կառավարությանը, երկրորդ՝ հորդորում են ընտրել անցումային ժողովրդավարությունը կոշտ կառավարման էլեմենտով:
