✅ Vətən müharibəsi şəhidlərinin əziz xatirəsinə həsr etdiyimiz digər videolardan xəbərdar olmaq üçün kanalımıza abunə olmağınızı tövsiyə edirik.
✅ Rəsmi facebook səhifəmiz: [ Ссылка ]
Kimisi körpəsini, kimisi gəncliyini, kimisi gözü yaşlı anasını, bacısını, sevgilisini geridə qoydu. Darda qalan Vətən 30 ildən sonra onları çağırırdı çünki. Bu çağırış hər şeydən əziz idi onlara. Ona görə də heç nə kəsə bilmədi qarşılarını. Geriyə baxmadan Vətənin dadına yetişmək üçün tələsdilər. Canlarını qurban verəcəklərini bilə-bilə. Bu çağırış həm də bir qisas sədası idi. 30 il sonra birinci Qarabağ savaşında itirdiyimiz şəhidlərimizin, canının bir parçasını o savaşda qoyan qazilərimizin qisasının alınacağı meydan.
Ər meydanına atılan hər qəhrəman bir tarix yazdı bu savaşda. Yaşı az, ya da çox, fərq etmədi. Damarlarında axan qeyrət güc verdi onlara. Elə Kərim Qeyrətxan oğlu Əliyev kimi. Cəmi 20 yaşı olsa da, bu illərə sığdırdığı dastan yüzilliklər boyu tarix kitablarında gələcək nəsillərə öyrədiləcək.
2000-ci il yanvarın 1-də Xızı rayonunun Fındığan kəndində anadan olub Kərim Əliyev. 2006-cı ildə birinci sinfə qədəm qoyan Kərim 2017-ci ildə məzun olduqdan sonra Vətən qarşısında borcunu ödəmək üçün hərbi xidmətə gedir.
Hələ uşaqlıqdan Vətən sevgisi ilə böyüyən Kərim, atası, birinci Qarabağ Müharibəsinin iştirakçısı olan Qeyrətxan Əliyevdən ona daim müharibə barədə danışmağı xahiş edirmiş.
Ötən ilin iyul hadisələri zamanı general Polad Həşimovun şəhid olması isə onda düşməndən qisas yanğısını daha da artırır.
Təcrübəli snayperçi kimi hərbi xidmətdən yenicə tərxis olunsa da, Vətən Müharibəsi başlayarkən öz istəyi ilə yenidən döyüşlərə qatılır. Atasını, anasını, dörd bacısını geridə qoyaraq. Kərimin döyüş yolu Tərtərdən başlayır.
Şuşa yaxınlığında, Qırmızı bazar ətrafında gedən qızğın döyüşlər Kərimin son döyüşü olur.
Döyüş yoldaşları isə onun qəhrəmanlığını, 20 yaşa sığmayan cəsurluğunu hələ də unuda bilmirlər.
Dayısı qızı Venera isə Kərimə olan minnətdarlıq borcunu adına şeirlər yazmaqla bildirir.
Vətən darda idi, çağırdı səni,
Getdin ardına baxmadan, Kərim.
Anan da indi çağırır səni,
Bəs niyə gəlmirsən, ay Şəhid Kərim?
Bu boyda bir dastan yazmaqmı olar?
İyirmini keçməyən yaşda, ay Kərim
Min il yaşasaq da fani dünyada
Əbədi sən varsan ən başda, Kərim
Bəzən düşünürəm, var-gəl edirəm,
Bax indi biz sağıq, dünyada varıq
Bir anlıq ömrümə baxıb keçirəm
Deyəsən eləcə-beləcə varıq
Kərim son sözlərini ailəsinə döyüş yoldaşı vasitəsilə belə çatdırıb: Bu nömrəni mənə oğlunuz vermişdi. Onun əsgər yoldaşıyam. Demişdi ki, mən Şəhid olsam, bu nömrəyə zəng elə. De ki, oğlunuz dedi ki, dalımca ağlamasınlar. Anamı sakitləşdirin, deyin ki, sevinsin, Şəhid olub oğlun! Atam başını dik tutsun, qürurlansın. Bacılarım dil deməsin, göz yaşı tökməsinlər. Fəxrlə "Şəhid bacısı" adını daşısınlar....
20 yaşlı şəhid Gizir doğulduğu kənddə, noyabrın 5-i torpağa tapşırılıb.
Kərim Əliyev ölümündən sonra “Vətən uğrunda” və “Xocavəndin azad olunmasına görə” medalları ilə təltif edilib.
İndi kənd sakinlərinin yeganə istəyi Kərim Əliyevin təhsil aldığı Fındığan kənd orta məktəbinin onun adını daşımasıdır.
#sehidler #Sehidaileleri #qaziler
