قسەیەكی پارێزەر پەیمان عیزەدین، كەمیوانی بەرنامە لەگەڵ رەنج بوو بۆ میوانەكان‌و بینەرانیش جێگای سەرەنج بوو كاتێك گوتی "كۆمەڵگای كوردی لەبارترین كۆمەڵگایە بۆ بەروودان بە هاوڕەگەزخوازی" هۆكارۆی ئەوەشی لە بەرنامەكەدا بە وردەكاری باسكرد، هاوكات سەرۆ قادر كە وەك نووسەرێك لە بەرنامەكەدا بەشداربوو كاردانەوەی جۆراجوۆری لێكەوتەوە كاتێك گوتی "هێشتا زیاتر لە نیوەی كۆمەڵگای ئینسانەكانی ئێمە كۆیلەن". هۆكاری ئەوەشی لە بەرنامەكەدا باس كرد.
"دوو شوێن لە كوردستان پشتیوانی لە هاوڕەگەزخوازن دەكەن"
"هیچ دووكەڵێك بێ ئاگر نییە، بەنمونە پرسی ئەم جێندەری ئێستا باس دەكرێت بەتایبەت كە ناڕوونییەك لە پرسەكەدا هەیە ئەوانەی بانگەشە بۆ جێندەریدش دەكەن ئەوە ناشارنەوە كە لە جێندەردا جێگای هاوڕەگەزخوازیش دەبێتەوە". سەبریە غەفار، ئەندامی سكرتاریەتی یەكگرتووی خوشكان بەم جۆرە گومانی خۆی لە بەرنامەی لەگەڵ رەنج لەسەر پرسی جێندەر پیشاندا دەشڵێت "ئەو شێوازە خەباتەی ژنان كە ئەمڕۆ لە كوردستان گرژییەكی لەسەر دروستبووە، بەهۆی دەركەوتنی هێماكانی جێندەر و فیمینیزمەوەیە". بەبڕوای ئەو ئەندامەی یەكگرتووی خوشكان بە درێژایی مێژوو نێوان ژن‌و پیاو لاسەنگ بووە.
لە كۆتایی قسەكانیدا ئەو بەرپرسەی یەكگرتووی خوشكان ئاماژەی بەوەدا لە كوردستاندا دوو شوێن بە كار‌و پڕۆژەكانیان پشتیوانی لە هاوڕەگەزخوازان دەكەن و گوتی "رێكخراوی راسان و بەشی جێندەری زانكۆی ئەمریكی لە سلێمانی ئەو دوو شوێنن كە پشتیوانی هاوڕەگەزخوازان دەكەن".
حاجی كاروان: سێ كەسم چارەسەركردووە كە مەیلی هاوڕەگەخوازیان هەبوو
حاجی كاروان، كە وەك بانگخوازێكی ئیسلامی لەبەرنامەكەدا بەشداربوو ئەوەی خستەڕوو تاوەكوئێستا سێ كەس كە مەیلی هاورەگەخوازیان هەبووە لەلای ئەو چارەسەریان وەرگرتووە، لەم كاتەدا پەیمان عیزەدین وەك یەكێك لە میوانەكانی دیكەی بەرنامەكە پرسیار ئەوەی كرد چارەسەرەكەیان چییە بووە؟ بە جۆرێك لە تەنزیشەوە گوتی "چارەسەری ئەوەیە رەشكە بخوات؟". حاجی كاروان بە كەمێك توڕەبوونەوە وەڵامیدایەوە گوتی "ئەگەر قسە نازانی مەیكە". بەپێی گێڕانەوەكانی حاجی كاروان ئەوەی لەلای ئەو چارەسەرۆی وەرگرتزوە دوو كوڕ‌و كچێك بوون، لەبارەی چارەسەرەكەشیان گوتی "یەك گۆڕینی ئاڕاستەی بیركردنەوەیان و دوو گوێگرتن لە قورئانی پیرۆز، چونكە بمانەوێ یان نا شیتان كار لەسەر ئەم جۆرە كەسانە دەكات".
بەبۆچوونی حاجی كاروان لەسەر ئاستی دنیا زۆر پشتگیری هاوڕەگەزخوازان دەكرێت بە تایبەت 35 وڵات بە ئاشكرا پشتیوانیا دەربڕیوە گوتیشی "لە سویدا تەنها لە 2022دا 35هەزار منداڵ دراوەتە هاوڕەگەزخوازان".
ئەو بانگخوازە ئاماژەی بەوەش كرد، لە كوردستاندا بەتایبەتی لە زۆنی سەوز ئەو برەودانە بە پرسی هاوڕەگەزخوازی هەیە و گوتی "سەرۆكی ئەنجوومەنی پارێزگای هەڵەبجە كاخەزی فەرمیی خستەڕوو كە جێگری سەرۆكی حكومەت رێگەپێدانی دەركردووە بۆ ئەوەی رێگە بەو كەسانە بدرێت بچن بۆ كۆلێژەكان".
سەرۆ قادر: زیاتر لە نیوەی كۆمەڵگای ئێمە كۆیلەن
سەرۆ قادر، نووسەر وەك میوانێكی دیكەی بەرنامەكە باسی لەوە كرد یاساكانی كوردستان پەیوەست بە مافەكانی مرۆڤ خراپن و هێشتا بەشێك لە یاساكان كۆیلایەتیان لەسەر ئافرەتان هەڵنەگرتووە گوتیشی "هێشتا زیاتر لە نیوەی كۆمەڵگای ئینسانەكانی ئێمە كۆیلەن". ئەو جەختی لەوەش كردووە كۆمەڵگای ئێمە هەرچۆنێك بێت پێشكەوتنی دنیا راناوەستێ مافەكانی ئافرەت بەوەپێش دەچێت، لەبارەی پرسی جێندەریش گوتی "ئەوەی ئێستا لەبارەی پرسی جێندەرەوە گوێمان لێی دەبێت، دەنگدانەوەی بەشێك لە كۆمەڵگەیە كە پابەندە بەو بەهایانەی نرخی ژیانیان نەماوە. ئەوانە كەسانێكی كۆنەپارێزن كە لە هیچ قۆناخێكدا ئامادە نین بە ئاسانی خۆیان بدەنە دەست پێشكەوتنی مرۆڤ بەو شێوەیەی لە بەرژەوەندیی كۆمەڵگەكان و لە بەرژەوەندیی گەشانەوە و بەهێزكردنی تاكە لەنێو كۆمەڵگادا."
ئەو نووسەرە ئەوەش دەخاتەڕوو دەبێت ئافرەت و پیاو بە هەموو جیاوازی و تواناكانیانەوە وەكو یەك ئازادبن و هیچ جیاوازییەك لەنێوانیاندا نەبێت. دەشڵێت "دەبێت كەسیش بۆی نەبێت بە ئافرەت بڵێت تۆ ئازادی، بەڵام دەبێت بەم شێوازە بژیت و كار بكەیت و بجووڵێیتەوە".
لەبارەی ئەو پێناسانەی لە كۆمەڵگەی كوردستاندا بۆ جێندەر دەكرێن، نووسەرەكە دەڵێت، "كاتێك زانست كۆمەڵگەیەك ناچار دەكات پێشبكەوێت، بەشی كۆنەپەرستی كۆمەڵگەكە خۆیان بە پێناسەی زانستەوە هەڵدەواسن، بەڵام لەڕاستیدا روانگەی خۆیانی تێدەئاخنن؛ بۆیە لە هەر شوێنێك زڕەزانست هاتە ناو پێناسە زانستییەكانەوە، ئینجا زانكۆ بێت یان یاسا، بەتاڵی دەكاتەوە و بەرەو دواوەی دەباتەوە. ئەوەی ئێستا ئێمە لە هەرێمی كوردستان دەیبینین، دەنگدانەوە و هاتوهاواری زڕەزانستە."
"كۆمەڵگای كوردی لەبارترین كۆمەڵگایە بۆ بەروودان بە هاوڕەگەزخوازی"
پەیمان عیزەدین، پارێزەر و ئەندامی خولی سێیەمی پەرلەمانی كوردستانن لەبەشێكی قسەكانیدا لەم بەرنامەیەدا باسی لەوە كرد "كە كۆمەڵگای كوردی لەبارترین كۆمەڵگایە بۆ بەروودان بە هاوڕەگەزخوازی". هۆكارەكەشی بۆ ئەوە گەڕاندەوە كە باسكردنی غەریزە لە كۆمەڵگای كوریدا بفە‌و قەدەخەكراوە.
لەبارەی تێگەیشتن لە چەمكی جێندەر لە كوردستان گوتی "ئەم ناحاڵیبوون و خراپ تێگەیشتنە لە چەمكی جێندەر كاریگەریی خراپی لەسەر ناو و ناوبانگی هەموو ئەوانە كردووە كە داكۆكی لە مافەكانی ژن دەكەن".
پەیمان عیزەت ئەوەشی خستەڕوو ئەوانەی ئێستا لە هەرێمی كوردستان پرسی هاوڕەگەزخوازی دەكەنە بیانوویەك بۆ لێدان لە چەمكی جێندەر، ئەو كەسانەن كە ترسیان لەو بەشەی چەمكەكە هەیە كە ئامانجیەتی ئەركەكان سەرلەنوێ هەڵبوەشێندرێنەوە و لەسەر بنەمای توانا و لێهاتوویی مرۆڤەكان دابڕێژرێنەوە
ئەم بەرنامەیە شەوی 01-01-2023 بەشێوەیەكی راستەوخۆ پێشكەشكرا :
