#oranews #tedhenatpersonale #pd #ps #be

Projektligji “Për mbrojtjen e të dhënave personale” parashikon gjoba deri në 20 milionë euro për shkeljen e rregullave, duke synuar përafrimin me standardet e BE. Opozita dhe grupet e interesit e kritikojnë për qëllime elektorale dhe masa të larta ndëshkimore, ndërsa mazhoranca mbron rëndësinë e harmonizimit me ligjet evropiane

Në diskutimet e Komisionit të Sigurisë “Për mbrojtjen e të dhënave personale” me përfaqësues të shoqërisë civile dhe grupe interesi, përfaqësuesja e Bashkimit Tregtar të Shqipërisë, Mira Pogaçi ngriti shqetësim lidhur me masën e gjobave, ndërsa procesi, sipas saj, ka alarmuar biznesin dhe sipërmarrjen në vend.

“Në fund të tetorit 2024, u bëmë me dije për miratimin e projektligjit. Shprehim shqetësim për faktin se kjo është bërë në shkelje të ligjit, sa i takon njoftimit dhe konsultimit publik. Nisur nga kjo, 16 organizata iu drejtuan Kryeministrit me një shkresë, në lidhje me këtë shqetësim. Konsultimi i fundit publik për këtë projektligj është bërë në korrik të vitit 2022 dhe asokohe nuk ka qenë konsultim me bazë të gjerë. Po flas në lidhje me shoqatat e biznesit dhe grupet e interesit. Mungesa e këtij procesi na alarmoi dhe ndikoi negativisht lidhur me transparencën dhe pjesëmarrjen në këtë projektligj. Shqetësimi i parë ka të bëjë me masën e gjobave. Ky projektligj ka transfuzuar GDPR (General Data Protection Regulation) të Bashkimit Evropian, i cili përcakton vetëm tavane në lidhje me gjobat. Gjobat e parashikuara për kundërvajtje administrative shkojnë deri në 10 milionë euro apo 20 milionë euro, gjoba që do të falimentonin lehtësisht çdo kompani në vend”, u shpreh ajo.

“Ky parashikim është lënë i hapur nga 0-10 milionë apo 0-20 milionë euro. Nuk ka një ndarje të shkeljeve në të lehta, të mesme dhe të rënda. Pse është lënë një dorë kaq e lirë, nga 0-10 milionë euro apo 0-20 milionë euro?” – tha Pogaçi.

Aleko Polo, drejtor i Bashkimit Prodhues të Shqipërisë, tha në se prezenca e tyre në komision ka qenë urgjente. “Dy vite heshtje nga konsultimi publik, neve na duhet kohë për këtë ligj kaq të rëndësishëm. Flasim për gjoba alarmante, 10, 20 milionë euro. Ne e kuptojmë që i tillë është ligji në BE, por a jemi ne të përgatitur për këtë?”, shtoi ai.

Deputeti i opozitës, Enkelejd Alibeaj kërkoi që për herë të parë, Komisioni i Sigurisë të japë një sinjal të mirë, bashkëpunues, për një projektligj që ka rëndësi për biznesin dhe sipërmarrjen në vend.

“Në Parlamentin e shqiptarëve, dikush ka ardhur sot për t’i thënë gjërat toç, siç i ndjen. Nuk është ky momenti që Parlamenti të tregohet arrogant, është sinjali më i gabuar, modeli më i keq se si Parlamenti mund të tregohet arrogant.

Ju mund ta votoni dhe nesër, por nëse ka një ves procesi ligjvënës në 34 vite është arroganca ndaj përdoruesve të ligjit. Duhet t’i dedikojmë vëmendjen dhe respektin maksimal kësaj shoqërie të pa kapur nga çarku i qeverisë. Kërkesat e tyre janë procedurale, thjesht nuk janë konsultuar.

Ligji për mbrojtjen e të dhënave personale duhet të kurojë ca të dhëna të individëve, në fakt është shpërfytyruar vetëm me një nen, shndërrohet në një ligj tatimor, zhvatës për të vendosur gjoba rekord, 10 apo 20 milionë euro.

Fryma policore e qeverisë sot ka thyer çdo lloj tabuje. Nxitimi na qenka që duke krijuar një aureolë ligjore, gjithë biznesi i frikësuar nga gjobat stratosferike i shndërron në klientë të qeverisë, që të dhënat personale të përdoren për qëllime aspak kushtetuese dhe demokratike”, tha Alibeaj.

Ndërkohë, Edvin Prençe, përfaqësues i sektorit fason në vend, kërkoi një reflektim mbi këtë projektligj, duke kërkuar që të mos bëhen diskutime tre muaj para zgjedhjeve, por të shtyhet me 6-7 muaj.

Përfaqësuesja e Komisionerit Publik u shpreh në këtë komision se “hartimi i këtij ligji ka nisur në vitin 2020, më pas i ka kaluar Ministrisë së Drejtësisë, për t’u “kurorëzuar” në korrik të vitit 2022, i ndarë në dy tryeza konsultimi publik”.

“Ligji nuk ka fjetur dy vjet, por i është nënshtruar konsultimit publik, madje i është çuar për konsultim Komisionit Evropian që ka dhënë dakordësinë e tij. Gjobat janë ulur me vlerën 1/3, sipas INSTAT dhe Eurostat, ka qenë 20 milionë dhe janë ulur në vijim. Niveli i gjobave është ai tavan, pra që jo gjithmonë vendoset, sepse për përcaktimin e një gjobe ka shumë kritere, nga natyra e shkeljes, pasojat apo sektori”, theksoi ajo.

Për më shumë lexoni: [ Ссылка ]

Website: www.oranews.tv

Youtube [ Ссылка ]

Facebook: [ Ссылка ]

Instagram [ Ссылка ]

Twitter [ Ссылка ]

Follow Televizionin Ora News

свернуть