АҚШ-пен арадағы қарым-қатынас туралы жағдай түсінікті. Енді батыстың өзге де алпауыт елдерінің Қазақстанмен қарым-қатынасы жөнінде.

Ертең премьер-министр Дэвид Кэмеронның шақыруымен Нұрсұлтан Назарбаевтың Лондонға ресми сапары басталады. Британдық бұқаралық ақпарат құралдары сапар алдында еліміз туралы жарыса жазып жатыр. Қазір Ұлыбритания астанасында жүрген әріптесім Зайнұр Байжігіт ағылшындық басылымдарды зерделеп көрді.

Британия ақпарат құралдары Елбасының сапарына баса назар аударуда. Тіпті еліміздегі ауыс-түйістерді де қалт жібермей отыр. Мәселен, 1 млн 700 дана таралыммен шығатын Daily mail басылымы Ұлттық банктың төрағасы Қайрат Келімбетов кетіп, оның орнына Президент Данияр Ақышевтың кандидатурасын ұсынғанын жарыса жазуда. Ал халықаралық Рейтер агенттігі: «Қазақ Президенті Батысқа жиі сапарлатып жүр. Бұл – Қазақстанның Батысқа бет бұруы», – деп бағалауда. Жалпы Ұлыбритания мен Қазақстан өзара ынтымақтастықты қай салада болсын байыпты жүргізіп келеді.

Осы аптада Нұрсұлтан Назарбаевтың жұмыс кестесі өте тығыз болмақ. Алдымен Елбасы премьер-министр Дэвид Кэмеронмен кездеседі. Саясаткерлер екі жақтың ғана емес, жаһандық және өңірлік мәселелер бойынша да екеуара пікір алыспақ. 2005 жылдан бері қазақ экономикасына 11 млрд доллардан астам инвестиция құйған Ұлыбританияның біздің жерде бірлескен 500 кәсіпорны жұмыс істейді.

Айта кетерлігі, биыл Ұлыбританияға шығарылатын қазақстандық экспорт 21 пайызға артты. Есесіне импорт 15,5 пайызға қысқарған. Тұманды Альбион елі он төрт мемлекетпен алыс берісті ұлғайтпақ. Оның қатарында Қазақстан бар. Сондықтан Лондонның Астанада геосаяси ғана емес, үлкен коммерциялық мүддесі бар деуге толық негіз бар. Бұдан бөлек патшайым Елизавета Нұрсұлтан Назарбаевтың құрметіне салтанатты дастархан жаймақ. Ағылшын монархы мұндай ілтипатты кез келген саясаткерге көрсете бермейді. Сондай-ақ Мемлекет басшысы Ұлыбританияның іскер топ өкілдерімен кездесіп, қазақ елінде қай салаға қаржы құюға болатынына тоқталмақ. Сапар аясында құны шамамен төрт млрд долларды құрайтын 25 құжаты бекиді деп жоспарлануда. Кейбір ақпар бойынша, Ұлыбритания Қазақстанда фармацевтикалық зауыт құрылысын салуға ниетті. Жалпы Президенттің сапары екі күнге жалғаспақ.

Авторлары: Зайнұр Байжігіт, Айдос Меделбек, Дулат Ентебеков

свернуть