«Կանանց հզորացման և համայնքային զարգացման» ՀԿ-ի նախագահ Իրինա Հովհաննիսյանն առաջին մասնագիտությամբ կրոնագետ է, այնուհետև ստացել է տնտեսագետ-մենեջերի որակավորում, անցել բազմաթիվ վերապատրաստումներ և դասընթացներ։
Աշխատանքային ուղին սկսել է հարազատ Ճամբարակի հեռախոսային ցանցից, որտեղ ղեկավարել է կադրերի բաժինը, այնուհետև Ճամբարակի քաղաքապետարանի վարչակազմի ղեկավարն է եղել։ Իրինան աշխատել է ինչպես պետական և մասնավոր, այնպես էլ հասարակական ոլորտներում։
Եղել է «Հայանտառ» ՊՈԱԿ-ի «Ճամբարակի անտառտնտեսություն» մասնաճյուղի տնօրենը։ Վաղ ամուսնությունը, անձնական խնդիրներն ու դրան հաջորդած բոլոր բարդությունները Իրինան համարում է ոչ թե դժբախտություն, այլ իրեն կռող, ուժեղ դարձնող փորձություններ:
