Дәл қазіргі сәтте ақша айырбастау бөлімшелерінде 1 доллардың бағамы - 186 теңгенің маңайында. Ұлттық банк төрағасы кеше түнде белгілі болған бұл жағдайды бүгін түсте тілшілерге түсіндірді. Таяуда ғана теңге құнсызданбайды деп құлақтандырып, араға ай салмай, АҚШ ақшасын аспандатып жіберген Келімбетов мырза бұл өзгеріс - бағаларға бәлендей әсер ете қоймайды, - деп сендіруге тырысты. Алайда, бірқатар ірі сауда орындары жаппай жабылып, азық-түлік дүкендеріндегі тауар мөлшерлеп сатылып жатыр. Доллар дүрбелеңі - Ирина Советжанқызының материалында....
ҚАЙРАТ КЕЛІМБЕТОВ, ҚР Ұлттық Банкінің төрағасы:
(23.12.2013 ж.)
Ұлттық валютаның саясатында ешқандай өзгерістер болмайды. Сондықтан қазіргі валюталық ахуалда ешқандай проблемалар жоқ. Ұлттық банк өзінің саясатын ары қарай жалғастырады.
Естідік! Сендік, әрине. Келімбетов келгенде, міз бақпайтын Марченконың кеткеніне қуанып, бөркін аспанға атқандар көп болған. Өз баламыз келді, деп өзеурегендер де көп еді. Қазақшасы ежіктеу болса да, әйтеуір, қазақтың баласы келді деп қуанған еді, бірақ Қайраттың қолымен теңгесі құнсызданады демеген.
ҚАЙРАТ КЕЛІМБЕТОВ, ҚР Ұлттық Банкінің төрағасы:
155 теңге емес, енді жаңа деңгей болады. Енді жалпы бағасы 185. Енді өзгермейді.
Там-тұмдап жинаған қаражатын қалай сақтарын білмей жүрген ел, тағы да Қайратқа сенді. Теңгеде - береке бар дегесін, айтқанын айнытпай орындады.
ҚАЙРАТ КЕЛІМБЕТОВ, ҚР Ұлттық Банкінің төрағасы:
(15.11.2013 ж.)
Менің ойымша, біз, қазақстандықтар ұлттық валютада ұстауымыз керек. Менің ойымша, сондай шешім дұрыс болады.
Бірақ бұл да дұрыс шешім болмады. Ақшаны үш түрлі валютада сақтау керек деген Марченко мырзаны тыңдай салу керек пе еді?! Дегенмен, ең бастысы - ұтылмаса болғаны.
