Нысанды пайдалануға беру осы жылдың желтоқсанына белгіленді, деп хабарлайды елорда әкімдігінің медиа орталығы.

2011 жылы құрылыс басқармасымен жалпы білім беретін оқу орталығына жалғай салынатын ғимараттың құрылысына конкурс жарияланған болатын. Бұдан кейін оқу орнының кәсіби техникалық орта білім беру мекемесі қатарына көшірілуіне байланысты жобаға түзетулер енгізілді.

«Нысан 3 бөлікке бөлінді. Қазіргі таңда нысанның 2 бөлігі пайдалануға берілді. 1 желтоқсанға қарай құрылыс жұмыстары толығымен аяқталып, жұмыстағы және мемлекеттік қабылдау актілері беріледі деп жоспарлануда. Құрылыс жұмыстарына тапсырыс беруші - білім беру басқармасы, құрылыс жұмыстарын жүргізуші – Астана қаласы әкімдігінің құрылыс басқармасы. Құрылыс жұмыстары 2011 жылы басталған болатын», – деп мәлімдеді көпбейінді колледждің директоры Серік Ташенов.

Колледж директорының мәліметінше, студенттер 7 мамандық бойынша білім алады. Жаңа ғимарат пайдалануға берілгеннен кейін колледж күндізгі бөлімде 600 студентті оқытады және де оқушылар кешкі уақытта да сабаққа келе алады.

«Қаржылық қиындықтарға байланысты құрылыс жұмыстары жоспарға сай жүргізілген жоқ. Соңғы екі жылда қаржыландыру мүмкіндігі пайда болып, біз құрылыс жұмыстарын аяқтағалы отырмыз. Колледжді көпбейінді етіп құрудағы мақсат - жас астананы қызмет көрсету саласының мамандарымен қамту», – деп түсіндірді Серік Ташенов.

Құрылыс жұмыстарының ауданы 11 мыңнан астам шаршы метрді құрайды. Кешен 3 бөліктен тұрады. Олардың 2-уі – оқу, шаруашылық-әкімшілік бөлімдері болса, үшіншісі – мәдени-спорттық бөлім.

«Бізде спорт, акт, жаттығу залдары мен бассейн бар. Жазғы уақытта мұнда 100-ден астам адам жұмыс істеді. Қазір жұмыстар аяқталғалы отыр. Осыған байланысты бүгінде елудей жұмысшы еңбек етуде. Абаттандыру бойынша біраз жұмыс істелді. Газондар төселіп, ағаштар отырғызылды. Әкімдіктің қолдауымен біз осындай жоспарды іске асырдық» - деді Серік Ташенов.

свернуть