Torpağa bax, şəhid anası, itkin ordadır! Torpağı sev, oxşa, ağını da, laylanı da torpağa söylə. Çünki oğlun bu torpağı canından çox sevdiyi üçün oraya üz tutdu, oranı beşik seçdi özünə. Elvinin Vətən sevgisi də bu torpaqdan başlamışdı. Axı, qəhrəmanlıq ana qucağından, evdən, ailədən, ocaqdan başlayır. Vətən, torpaq sevgisi ailədə aşılanır insana. Süddən, qandan, gendən gəlir…

44 günlük Vətən Müharibəsinin şəhidi Məmmədov Elvin Mübariz oğlu 26 fevral 1997-ci ildə Göyçay rayon Ləkçıplaq kəndində anadan olub. əkiz doğulan Elvin 2002-ci ildə Ləkçıplaq kənd 1 saylı tam orta məktəbinə gedir. Əksər əkizlər kimi qardaşı ilə zahiri bənzərliyi olduğundan bəzən yolda görənlər, hətta müəllimləri də onları ayırd etməkdə çətinlik çəkərdi. Məktəbi bitirdikdən sonra Elvin hərbi xidmətə çağırılır. Görnüşcə arıq, çılız olduğundan əsgər yoldaşları Elvini “nar dənəsi” adlandırırdılar.

Hərbi xidmətini uğurla başa vurduqdan sonra ailəsinin yanında yaşayaraq müxtəlif mülki işlərdə çalışdı Elvin. Sakit təbiəti, gülər üzü onu tanıyanların yaddaşında ömürlük həkk olunardı.

Sentyabr 21 Elvinə Hərbi Səfərbərlik Xidmətindən hərbi təlimlərə qatılmaq üçün çağırış vəsiqəsi gəlir. Heç tərəddüd etmədən hərbi təlimlərə qoşulur. Gedərkən “ana narahat olma bir iki saata qayıdacam” desə də bu vida Elvinin son vidası olur. Anası deyir ki, o zaman Elvini bir daha görə bilməyəcəyim ağlımın ucundan da keçmədi. Bilsəydim balamı doyunca öpüb - qoxulayardım. Göyçay rayon Hərbi komissarlığına gələn Elvinə Tərtər istiqamətində yola düşəcəyini bildirirlər. Bu zaman Elvin əkiz tayını qucaqlayıb “salamat qal, tezliklə görüşərik” deyir.

Sentyabrın 27-də düşmənin əks hücumunun qarşısını alarkən başlanan döyüşlər zamanı Elvin Goranboy, Tərtər rayonlarında qəhrəmancasına döyüşür. Amma onun qismətində cəmi 5 gün döyüş yolu yazılır. 1 oktyabr 2020-ci il tarixində Ağdərə uğrunda gedən döyüşlər Elvin Məmmədovun son döyüşü olur. Aldığı ağır güllə yarasından sonra Elvin şəhidlik zirvəsinə ucalır.
Elvinin nəşini qarşılamağa böyükdən kiçiyə bütün kənd sakinləri yığışmışdı. Şəhidimiz Ləkçıplaq kənd qəbiristanlığında “Şəhidlər ölməz Vətən bölünməz” şüarı altında şəhid qardaşlarının yanında dəfn olur....

Cəmi 23 yaşı olan qəhrəmanımızdan əzizlərinə çox az xatirə qalsa da, tarixin qəhrəmanlıq yaddaşında Elvin əbədi yaşayacaq.

Kim bilir qəlbində nələr vardı Elvinin, bəlkə də gizlicə sevgi yaşardı... Bəlkə də, yaxın gələcəkdə toyunun xəyallarını qurardı... Bütün arzularını qəlbində dəfn edib Vətəni qorumaq üçün canını fəda etdi Elvin. Axı qeyrətli igidlər Vətənin dar günündə düşmən qarşısına, önə çıxır, sinəsini sipər edir və çoxu şəhid olaraq torpağa tapşırılır. İgidlər torpağa əkilir ki, qeyrət, qəhrəmanlıq, hünər, təəssübkeşlik bitsin, cöcərsin, qol budaq atsın...

44 günlük Vətən Müharibəsinin şəhidi Məmmədov Elvin Mübariz oğlu ölümündən sonra “Vətən uğrunda” medalı ilə təltif olunub.

свернуть