Интернетте зордукталган 16 жаштагы кыздын айылдаштары убактылуу кармоочу жайда кармалып турган шектүү менен жана анын жанында отурган башка адам менен сүйлөшкөн видео тарады.
Видеодо сүйлөшүп жаткан адам шектүүнү камерада отургандар аны жазалоону талап кылганын угууга болот.
Ал эми Чүй ОИИББинин маалымат кызматы учурда бул видео боюнча ички иликтөө жүргүзүүдө.
"Бул видео боюнча убактылуу кармоочу жайдагы бардык камералар текшерилип, телефон табылды. Мындан тышкары, милиция кызматкерлери бардык эрежелерди сактоо максатында камакка алынгандар менен маектешти.
Ошол эле учурда коопсуздук максатында шектүү бир кишилик камерага камалганын, бүгүн соттун чечими менен шектүү эки айга СИЗО-1ге камакка алынганын маалымдайбыз. Ал учурда камакта. Сокулук РИИБи табылган телефон боюнча ИИМдин кызматкерлерине карата кызматтык иликтөө иштерин жүргүзүүдө", - деп жазылат маалыматта.
Буга чейин Чүй облусунун Сокулук районунда 17 жаштагы кызга кол көтөрүп, зордуктоого шектүү жаран кармалган.
Белгилүү болгондой, кыздын атасы Сокулук РИИБине арыз менен кайрылган. Анда арыз ээси 5-декабрь күнү эртең менен 2004-жылы туулган кызын белгисиз бирөө Бишкек шаарына жумушка жеткирип коюуну убада кылып, жолдон күч колдонуп зордуктап салганын билдирген. Бул факты Кылмыштардын жана жоруктардын бирдиктүү реестрине 154-берене ("зордуктоо") боюнча катталып, сотко чейинки өндүрүш иши башталган.
