Елімізде ауыл шаруашылығын мемлекеттік қолдау көлемі жүйелі түрде жүргізіліп келеді. Бірақ та еңбек өнімділігі мен саланың тиімділігі көңілді көншітпей отыр. Ендігі жерде субсидиялаудың тәртібі өзгереді. Тиімсіз субсидиялар қысқарады.
Яғни мәселе нанға ғана қатысты емес. Бұл туралы Үкімет сағатында Ауыл шаруашылығы министрі Асылжан Мамытбеков мәлімдеді. Қазақстан сондай-ақ шаруашылыққа мемлекеттік қолдаудың австралиялық үлгісіне жүгінбек.
Мәжілісте өткен Үкімет сағаты ұзаққа созылды. Себебі министр Асылжан Мамытбеков субсидиялаудың жаңа тәртібін бүге-шігесіне дейін талдап түсіндірді. Жер емген диқан мен мал өсірген шаруаға субсидия осы уақытқа дейін ауқымды түрде беріліп келеді. Ол 2008 жылы 41,4 млрд теңге болса, биыл 177 млрд теңгеге дейін көтерілген. Бірақ та саланың өнімділік көлемі төмен. Ведомство басшысы ендігі жерде мемлекеттік қолдаудың жаңа тетіктері енгізілетінін айтты.
Асылжан Мамытбеков, ҚР Ауыл шаруашылығы министрі
-Ендігі жылдан бастап көптеген облыстарда субсидия мүлдем бөлінбейтін болады. Бірақ кейбір облыстарда әлі нарықтық бағамен, шектелген бағаның айырмашылықтары бар. Жоғары облыстарда келесі жылдың ортасына дейін субсидия беріліп отыратын болады.
Елімізде ауыл шаруашылығын мемлекеттік қолдау жалпы ішкі өнім үлесінің 4 пайызын құрайды. Бұл көршілес мемлекет Ресейде 8 пайыз, Беларусь елінде 18 пайыз шамасында. «Субсидиялау қазір қысқарғанымен, 2020 жылға қарай ауыл шаруашылығын қолдау деңгейі бүгінгіден 4,5 есеге артуы тиіс», – деп қалды министр.
Қар астында қалған астық жайы да Мамытбековті айналып өтпей қоймады. Әлеуметтік желідегі қызу талқыланған тақырыпқа ведомства басшысының жауабы дайын.
Асылжан Мамытбеков, ҚР Ауыл шаруашылығы министрі
-Астық алқаптарын аяқпен өлшеп жүру мүмкін емес. Ол жеке меншік бизнес. Индустрия министрінен: «Далада қардың астында қалған кірпіш бар ма?», – деп неге сұрамайсыздар. Ол да тауар, бұл да тауар.
Сондай-ақ Асылжан Мамытбеков ауыл шаруашылығын субсидиялаудың тиімділігін арттыру үшін австралиялық тәжірибе зерттеліп жатқанын айтты. Дәлірек айтқанда, ауыл шаруашылығы өнімдерін экспорттаушылар қауымдастығы саналатын Кернс тобының субсидиялау саясаты негізге алынбақ. Бұл топқа қазір әлемнің 20 елі мүше.
Авторлары: Нұрбек Байбосын, Серік Қоңырбаев
