Ал сенатор Светлана Жалмағамбетова әріптестерінен бір күндік еңбекақысын Атбасардағы су тасқынынан зардап шеккендерге аударуды сұрады. Үкімет су астында қалғандарға бір реттік жәрдемақы берген. Алайда оның мөлшері 25 айлық есептік көрсеткіш, яғни небары 46 мың теңге. Мұндай мардымсыз көмектің түкке жетпейтінін ашық айтқан сенатор Мәсімовтен өңірге қосымша 2,4 миллиард теңге қаражат бөлуді өтінді.
Атбасар қаласы мен оның іргесіндегі 4 ауылдағы 500-ге тарта үй суға кетті. Бұл елді мекендердегі 18 көше бұзылды. 1 жарым мың тұрғын жылдар бойы жиған бар мүлкінен бір сәтте айырылды. Су қайтқан соң тасқын астында қалған 488 үйдің 17-сінің жермен- жексен болғаны анықталды. Құзырлы мамандар тексеріп шығып апат аймағындағы 164 баспананың тұруға жарамсыздығын растады. Тағы 307 үйге шұғыл жөндеу жұмыстарын жүргізу керек. Бұдан бөлек күрделі жөндеуді қажет ететін 1 мектеп бар.
СВЕТЛАНА ЖАЛМАҒАМБЕТОВА, ҚР Парламенті Сенатының депутаты:
Алдағы уақытта осындай зардаптар болмауы үшін тағы да шаралар қолдану керек. Оның ішінде көпірді жөндеу керек. Оның ішінде су келмейтін дамбаларды салу керек. Осылардың бәріне 2 жарым миллиардтай қаражат керек.
