Г.Соосай "Эх"
1968 оны “ЗАЛУУ УРАН БҮТЭЭЛЧДИЙН ҮЗЭСГЭЛЭН” Монголын соцреалист урлагийн түүхэнд нэгэн онцгой үзэгдэл болон үлдсэн билээ. Энэхүү үзэсгэлэнд дэлгэгдсэн бүтээлүүд бүтээлчийнхээ амьдралд хэлмэгдэлтийн хар толбыг үлдээсэн ч дэлхийн нийгэм, соёлын сэтгэлгээнд орсон өөрчлөлтийн салхи монгол залуусыг тойроогүйг батлан Монголын дүрслэх урлагийн түүхийн нэгэн том судлагдахуун болон үлджээ.
Г.Соосай зураачийн реалист бус хийсвэр сэтгэлгээний аргаар, хадны зургийн дүр дүрслэлийг шингээсэн, монгол агуулга бүхий “Эх” хэмээх энэхүү бүтээл үзэл суртлын нөлөөнөөс болж “Хөрөнгөтний урлаг” хэмээн гадуурхагдаж байсан хэдий ч өдгөө Монголын уран зургийн галерейн сан хөмрөгт хүндтэй байрыг эзэлдэг юм.
Монголын уран зургийн галерей, МҮОНРТв-тэй хамтран бэлтгэсэн “Урлан” цуврал нэвтрүүлгийн 10 дахь дугаараар үзэгч та бүхэндээ Соосай нэрээр алдаршсан Гомбын Содномсамбуу агсны “Эх” бүтээлийг танилцуулж байна.
