‏"كۆكردنەوەی هەموو زیرەكییەكانی دنیا لەنێو ئامێرێكدا ‌و پێدانەوەی بە ‏مرۆڤەكان لە كەمترین ماوەدا".مامۆستایەكی زانكۆ كە میوانی بەرنامەكەبوو ‏بەو جۆرە پێناسەی ژیریی دەستكردی كرد، ئەو بە گومان بوو ‏كە لەم قۆناخەدا ژیریی دەستكرد بتوانێت‌ وەك مرۆڤ بیر بكاتەوە ‌و گوتی ‏‏"ئەوە تاوەكو ئێستا جێگەی گفتوگۆیە".

لەبارەی ژیریی دەستكرد، پرسیارێك لە بەرنامەكەدا خرایەڕوو ئایا دەكرێت یاسا ‌و رێنمایی بۆ ژیریی دەستكرد دابنرێت؟ لەلای ئەو ‏مامۆستایەی زانكۆ وەڵامەكە نەخێرە، چونكە "پێشكەوتنەكەی ژیریی ‏دەستكرد زۆر لەوە خێراترە یاسای بۆ دابنرێت".‏

لەدەستدانی بەشێك لەو كارانەی ئێستا مرۆڤ دەیكەن بۆ داهاتوو بەهۆی ‏ژیریی دەستكردەوە یەكێكە لەو مەترسییانەی ئێستا هەیە، بەڵام ‏بۆچوونی پێچەوانەی ئەوەش لەبەرنامەكەدا خرایەڕوو، دەبێت ‏چەند كار بەهۆی ژیریی دەستكردەوە لەدەست بدرێت؟ بەڵام لە هەمانكاتدا ‏ئەگەری ئەوەش هەیە كە ژیریی دەستكرد چەندین دەرفەتی دیكەی كار ‏بڕەخسێنێت، وەك میوانێكی بەرنامەكە گوتی "لەوانەیە ژیریی دەستكرد ‏چەندین كاری نوێمان بۆ بدۆزێتەوە كە ئەمڕۆ هەر بیرمان لێ نەكردبێتەوە".
‏
ئایا دەبێت كورد وەك نەتەویەكی بێ‌ دەوڵەت، بۆ ئێستا ‌و داهاتوو چی بكات ‏تاوەكو بەباشی لەگەڵ ژیریی دەستكرد هەڵبكات؟ لە وەڵامی ئەو پرسیارە گوترا لەئێستاوە لەسەر ئاستی تاك ‌و زانكۆكانیش كاری باش لەو ‏بوارەدا كراوە هەروەك میوانێكی بەرنامەكە دەڵێت "لە زانكۆی كوردستان ‏سەرەتایەكی باش بۆ كاركردن لەسەر ژیری دەستكرد دەستیپێكردوە". ‏

نائامادەیی زمانی كوردی ‌و بوونی شێوەزاری جیاواز لەنێو ژیریی دەستكرد ‏یەكێكی دیكە بوو لەو گرفتانەی لە بەرنامەكەدا باس كرا، بەشێكی زۆری ‏ئەوانەی قسەیان لەو پرسەدا كرد جەختیان لەوە كردەوە كە دەبێت ‏كتێبخانەی كوردی بە دیجیتاڵی بكرێت.‏

‏"زیانێكی ژیریی دەستكرد ئەوەیە تاوانی ئەلیتكرۆنی پێدەكرێت". ‏ئەوە سەرنجی قوتابییەكی زانكۆ بوو كە لە بەرنامەكەدا ئامادە بوو، وەڵامی ‏یەكێك لەمیوانەكان بۆ ئەو سەرنجە ئەوە بوو "هەرشتێك ‏Al‏ تێكی بدات هەر ‏بە ‏Al‏ دەتوانرێت چاكبكرێتەوە". شارەزایەكی ‏بواری ژیریی دەستكرد داوای لە دایك ‌و باوكان كرد بۆ باشی ئایندەی ‏نەوەكانیان لەئێستاوە منداڵەكانیان فێری (كۆدینگ) بكەن.

ئەم بەرنامەیە شەوی 13ی 10ی2024 پێشكەش كراو میوانە ‏سەرەكیەكانیش پێكهاتبوون لە ‏

‏- د.پۆڵا فەتاح، توێژەری زیرەكیی دەستكرد ‌و ‏‏مامۆستا لە ‏زانكۆی ‏‏سەڵاحەدین ‏‏

‏- د.عەبدولباست كامل، ئەندازیاری پرۆگرامسازی ‌و مامۆستا لە ‏زانكۆی كۆیە ‏‏‏

‏- یەحیا لەزگین چالی، بەڕێوەبەری ‏كۆمپانیایەكی ‏ژیری ‏دەستكرد ‏‏‏‏‏

‏- ئەڤین‏ قادر، خاوەنی كۆمپانیا بواری تەكنەلۆژیایی دیجیتاڵی ‏‏ ‏

‏- عەبدولهادی رواندزیی، ‏مامۆستا لە ‏زانكۆی كوردستان- هەولێر ‌و ماستەر ‏لە بواری ژیری دەستكرد ‏

‏- ئارا میران، مامۆستا لە زانكۆی بەریتانی نێودەوڵەتی ‏لە ‏هەولێر ‏‏‏

свернуть