TIRANE - Shifrat e dhunës në familje po rriten në mënyrë dramatike nga viti në vit. Kështu vetëm për vitin 2013, deri më tani janë plot 400 gra që i janë drejtuar gjykatës së Tiranës dhe kërkojnë urdhra mbrojtje nga burrat e tyre. Ndërkohë që nëse u referohemi statistikave të Drejtorisë së Përgjithshme të Policisë, të dhënat janë shumë të frikshme, dhe tregojnë se në familjen shqiptare gruaja nuk ka një vend të respektuar.

Më konkretisht, në vitin 2008, ka pasur 822 denoncime për dhunë në familje dhe për 377 prej tyre gjykata ka lëshuar një urdhër mbrojtje. Por vit pas viti numri i grave që u drejtohen autoriteteve të policisë për të denoncuar dhunën që ushtrohet mbi ta, brenda në familje, thuajse është trefishuar. Kështu në fund të vitit 2012, plot 2526 gra kanë denoncuar në polici dhunën që ushtrohet ndaj tyre, ndërsa gjykata ka lëshuar plot 1526 urdhra mbrojtje për ta.

Ndërkohë që shifrat duken alarmante edhe për vitin 2013. Deri më tani gjykata ka lëshuar plot 400 urdhra mbrojtje, ndërsa ka pasur rreth 600 denoncime. Dramatike janë edhe shifrat sa i përket humbjes së jetës së grave nga dhuna që është ushtruar mbi ta, nga një pjesëtar i familjes, që thuajse në të gjitha rastet ka qenë bashkëshorti ose ish bashkëshorti. Kështu viti 2012 është mbyllur me një bilanc prej 13 viktimash gra, nga dhuna në familje, ndërsa për vitin 2013, deri më sot, janë shënuar plot 11 viktima femra nga dhuna në familje.

Sevim Arbana, kryetare e shoqatës në "Dobi të Gruas Shqiptare", thotë se ka dy vite që ka shpërthyer një valë dhune e madhe kundër grave. "U bënë dy vite që ka shpërthyer një dhunë makabër kundër grave dhe nuk po di të ndalet, duhet të reagojmë të gjithë", - na thotë ajo.

свернуть