Versi di Mimmo Maddaluno, musica di Giovanni Acanfora, cantano Salvatore Minieri e Leda Fiotti. #BARRA2024 #FORMIDABILE #TOPCLASS
I
Ll'uocchie ‘e chi è ancora guaglione
fuoco ‘int’ ê vvene, ‘a forza ‘e ‘nu Lione
se conta ‘e juorne aspettanno ca vène ‘o mumento suoio.
Nun teme ‘a cumpetizione,
nn’ esiste sfida ca ‘o po' ffa' impressione.
Dint’ ‘e ggocce ‘e sudore scorre ‘a passione.
Fremme pe’ sentì ‘a canzona, ogne vierso sarrà sangue nuovo
ca ‘o va’ a degnere ‘o core d'ammore, còre gigliante.
Si, parla de’ ggigli se scorda ‘e durmì
e ‘o suonno perzo d’ ‘e nnotte ‘e Settembre, ‘o da' frennesia.
II
‘A cerja ‘e chi ‘a sape bbona,
‘o sguardo furbo ‘e nu viecchio vulpone
spalle nturzate e pussente so’ scrigni d’impresa e storia.
‘Na ruga figlia d’ ‘o tiempo,
scavanne ‘e ccarne ‘e virtù e l’esperienza.
Speruta cerca ancora n’ata emozione.
Voglio vedè ‘e figlie mije, girà ô CIAK comme facevo io
voglio ‘a femmena ca sbatte ‘e mmane, ‘e frate suoie.
Si, rimmango ‘a fore è ccu n’àncora ô còre
Ma si vaje ntuoste, tu rieste tranquillo, apponta papà.
III
N’intreccio ‘e generazioni
un concentrato ‘e freschezza e raggione
foja ‘e chi se vò magnà ‘o giglio gestita d’ ‘a ggente ‘e còre.
Unico supervisore,
da quarant’anne l'urdema parola
hanno fatto ‘e te, ‘nu paranzone.
Sfido chiunque a truvà, dint’ â BARRA o a ddò ‘o giglio se fa
il rispetto e la gran serietà, chesta è famiglia!
No, niente e nisciuno te pò assumiglià
stimoli nuovi e cunsigli preziosi hê fatto abbraccià.
IV
Ccà nun ce manca nisciuno
tutte ‘e paisi, ogne populazione
BARRA insidiosa e carnale, ogge mette in ballo ‘a gloria
Se scarta ‘o meglio â ‘int’ ‘ô bbuono,
chi è cuaccheduno e cchi resta nisciuno
cchiù forte ‘e tutte ‘e nnòve, fallo vulà.
Vai, ch’è ‘o mumento ‘e sfugà, chiuovi e croce s’hanno ‘a scatenà
tiene ‘o sanghe de’ gigliante overi, si FORMIDABILE
Va’, treccia e muscielli ogge ‘e te hanno ‘a tremmà
sussemo ‘o giglio comme saje fa’ tu, fallo da… BARRESE
