يا صباح الخير يا قنزوع شيمه
.. يا سلام الله على طلة بهاكي
لعنبو الايام ما للعمر قيمه
.. قبل لا اسقي غرسك وينبت غلاكي
دامك بقلبي تمادي في صميمه
.. بعثري قلبي ترى قلبي فداكي
شخبطي جدرانه وسوّي عزيمه
.. ونططي في حجرته فوق المراكي
غندريٍ جيتي الدنيا قديمه
.. ريحة امي في شعرك وفي لغاكي
ما ظلمتيني ولا جيتي ظليمه
.. ما خذيتي من صبايا الا ذكاكي
نور وجهك يشرق بكل تعتيمه
.. لا المصابيح الكبار ولا المشاكي
خدك الناضح حيا كنْه اسكريمه
.. كل ما ذبتي حيا لاذ بشفاكي
شيمتي واكثر خصالي المستقيمه
.. مقبرة كل الزمان اللي وراكي
خمسك الفرّج مكاسيب وغنيمه
.. صحوة من غفوة احلام ٍركاكي
ان رضيتي حولّت بالعذب غيمه
تورق اغصان الطهور من الاراكي
وان زعلتي والله ان هذي وخيمه
.. كيف ابكسب يابعد عمري رضاكي
#ابيات_شعريه #شعر #قصيد #شيمه #ياسر_التويجري #سناب
