şeir: Nüsrət Kəsəmənli
səs: Xəzər Süleymanlı
piano: Vüsal Namazlı


Qayıdıb gəlmisən gözləri yaşlı,
Deyirsən bir daha küsən deyilsən.
Hanı o vüqarın, o saymazlığın;
Yox, bu sən deyilsən, bu sən deyilsən.

Getdiyim hər yeri güdən sən idin
Küsəndə aylarla itən sən idin
Çırpıb qapıları gedən sən idin
Yox bu sən deyilsən,bu sən deyilsən.

Deyirsən vaxt keçir, zaman gözləmir,
Dilin dediyini ürəyin demir.
Bu yalvaran gözəl sənə bənzəmir,
Yox, bu sən deyilsən, bu sən deyilsən.

Deyirsən küsənlər barışar yenə,
Nə tez boyun əydin beş günlük qəmə?
Özündən razılıq yaraşır sənə,
Yox, bu sən deyilsən, bu sən deyilsən.

Dərdlisən, dərdini get danış suya,
Əl açma, alçalma mən verən paya,
Elə bil dilənçi gəlib qapıya,
Yox, bu sən deyilsən, bu sən deyilsən.

#xezersuleymanli #xəzərsüleymanlı

свернуть