Երևանի ավտոբուսների վարորդներն այսօր գործադուլ են արել պահանջելով աշխատավարձի բարձրացում և այլ աշխատանքային պայմանների բարելավում։ Երևանի քաղաքապետարանն առավոտից խոստանում էր պատժել վարորդներին, ընդ որում քրեաիրավական ճանապարհով։ Երեկոյան գործից հեռացվել են 35 վարորդ։ Եթե գործադուլը դադարեցվի, նրանց հետ կվերցնեն աշխատանքի։ Գործադուլավորներից Արմանը Epress.am-ի հետ զրույցում նման արարքը շանտաժ է որակել և պայքարի պառակտման փորձ։
«Մենք էլ չենք պատրաստվում գրոշներով ծանր աշխատանք անել։ Վաղը ևս շարունակվելու է գործադուլը, հավաքվելու ենք քաղաքապետարանի դիմաց, մինչև հարցը լուծվի», - ասել է նա։
Epress.am-ը ավելի վաղ հանդիպել է գործադուլավորներին «Երևանի ավտոբուս» ՓԲԸ-ի տարածքում։ Քաղաքին պատկանող ընկերությունը փակել էր գրասենյակի դռները, վարորդներին ներս չէին թողնում։ Բողոքի ակցիային եկան նաև տարբեր քաղաքական գործիչներ՝ լրագրողների ուղեկցությամբ։ Վարորդները նրանց հետ շփվելուց խուսափում էին, քանի որ «ընդդիմադիրները եկել էին պղտոր ջրում ձուկ բռնելու»։
«Մենք պալիտիկայով չենք զբաղվում։ Մեզ ընդամենը մեր աշխատավարձն է պետք։ Առողջություն ենք մաշում հանուն գրոշների»,- ասել է վարորդներից մեկը։
Օրվա ընթացքում մի քանի ավտոբուս դուրս է բերվել երթուղի։ Ըստ գործադուլավորների՝ դրանք տարբեր ՊՈԱԿ-ների աշխատողներ էին, որոնք չունենք ավտոբուս վարելու կարգ։
Մի քանի վարորդներ պատմեցին ներկա աշխատանքային պայմաններից, խնդրելու չտեսանկարահանել իրենց։
Ավելի լավ է, որ մենք կոպեկ չենք վերցնում, կենտրոնանում ենք ճանապարհի վրա։ Մեզ երեք ամիս առաջ խոստացել են աշխատավարձի բարձրացում 100-150 հազարով, պարապուդի օրերին՝ փոխհատուցում ու մոռացել են։ Ինչո՞ւ։
Կողքից գրում են՝ էդքան փող եք ստանում, բժիշկը էդքան չի ստանում։ Էսօր եմ իմ հարսին բերել ծննդատնից։ 500 դոլար տվել եմ կեսարյան հատում անելու համար։
Մեր գործը դանդաղ մահ ա։ Էս ամենադաժան գործն է, չի գնահատվում, սաղ շոֆեռները ունեն ողնաշարի գրիժա, մեկը՝ ես։ Իջնելուց պպզում էի, միայն դա էր օգնում։ Հիմա դրա ժամանակ էլ չունեմ։ Աշխատում եմ 7-ից գիշերվա 12-ը։
Ասում են՝ 14 ժամ աշխատի, երկու ժամ ընդմիջում արա։ Մենք հինգ րոպե կանգնենք, հարյուր տեղից զանգում են։ Քշելով ենք ուտում։ Ընդմիջման ժամանակ չունենք։
Մանրամասները՝ տեսանյութում։
