ဧရာဝတီမြစ်ကြောင်းတိုက်ပွဲမှာ စစ်ရှုံးခဲ့ပြန်တဲ့ စစ်ကောင်စီ
ဟန်နွေ /People's Sring
ဧရာဝတီမြစ်အတွင်းရေကြောင်းတိုက်ပွဲမှာ စစ်ကောင်စီတပ် စစ်ရှုံးခဲ့ပြန်တဲ့အကြောင်း ဒီတစ်ပါတ်မှာပြောပြပါမယ် ။
စစ်ကောင်စီတပ်ဟာ ကချင်ပြည်နယ် ၊ဗန်းမော်မြို့က စစ်တပ်စခန်းတွေအတွက် စစ်ကူ နဲ့ ခဲယမ်းရိက္ခာတွေကို ပို့နိုင်ဖို့ မန္တလေးမြို့ကနေ သြဂုတ်လ ၂၈ ရက်မှာ ဧရာဝတီ မြစ်ကြောင်းအတိုင်း ဗန်မော်မြို့ကို စစ်သင်္ဘော အနည်းဆုံး ၈ စီးနဲ့ဆန်တက်လာပါတယ် ။ ဒီစစ်ရေယာဥ် အုပ်စု ကို စစ်တပ်ရဟတ်ယာဥ်တွေကလိုက်ပါဝန်းရံပြီး တော်လှန်ရေးတပ်တွေက မတိုက်နိုင်အောင် လေကြောင်းကနေ အကာအကွယ်ယူဆန်တက်လာတာပါ။
မန္တလေးမြို့ဂေါဝန်ဆိပ်ကမ်းဂေါဝန်ဆိပ်ကမ်းကနေ ဧရာဝတီမြစ်ကြောင်းအတိုင်းဆန်တက်လာတဲ့ စစ်တပ်ရေယာဥ် အုပ်စုဟာ စဉ့်ကူး၊ သပိတ်ကျင်း၊ တကောင်းမြို့ အထိ တိုက်ခိုက်တာမခံရပဲ သာသာယာယာပဲ ဆန်တက်လာတာပါ။ ဒါပေမယ့် စစ်တပ်ရေယာဥ် အုပ်စုကို ထီးချိုင့် မြို့နယ်ထဲအရောက် မှာတော့ ကချင်လွတ်လပ်ရေးတပ်မတော်(KiA)နဲ့ ပြည်သူ့ကာကွယ်ရေးတပ်ဖွဲ့(PDF) တွေက စတင်တိုက်ခိုက်ခဲ့ပါတယ် ။
ထီးချုင့်မြို့နယ် နဲ့ ကသာမြို့နယ် အတွင်းမှာစစ်တပ် သင်္ဘောတွေထဲက ၂ စီးကို တော်လှန်ရေးတပ်တွေက တိုက်ခိုက်ဖျက်ဆီးနိုင်ခဲ့တယ် လို့ KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက People's Spring ကိုပြောပါတယ်။ ရဟတ်ယာဥ်တွေက ရေယာဥ်အုပ်နောက်ကို တောက်လျှောက် အကာအကွယ်ပေးနေတဲ့အတွက် KIA နဲ့ PDF တွေက တိုက်ဖို့ အလွန်ခက်ခဲခဲ့တယ် လို့သိရပါတယ် ။
စစ်တပ်ရေယာဥ် အုပ်စုတိုက်ခိုက်ခံရတာကြောင့် လိုက်ပါစောင့်ပေးနေတဲ့ ရဟတ်ယာဥ်နဲ့ ရေယာဥ်အုပ်ကနေ မြစ်ကမ်းဘေးကကျေးရွာတွေကို လက်နက်ကြီးနဲ့ ပစ်ခတ်တာ ၊ ဗုံးကြဲတာတွေဆက်တိုက်လုပ်ခဲ့တဲ့အတွက် ပြည်သူတွေ သေဆုံး၊ဒဏ်ရာရတာတွေရှိခဲ့ပါတယ် ။
ဒီလိုနဲ့ ရေယာဥ်အုပ်စုဟာ ကသာ နဲ့ရွှေကူကြားမှာလည်း အနည်းငယ်တိုက်ခိုက်ခံရပေမယ့် ကချင်ပြည်နယ် ရွှေကူမြို့ကို စက်တင်ဘာလ ပထမပါတ်မှာ ဆိုက်ကပ်နိုင်ခဲ့ပါတယ် ။ စစ်သင်္ဘောတွေဟာ ရွှေကူမြို့မှာ ၁၀ ရက်ခန့်ရပ်နားခဲ့ပါတယ် ။
ရွှေကူမှာ သေချာနားပြီး ဧရာဝတီမြစ်အတိုင်း ဗန်းမော်မြို့ကို ဆန်တက်လာတာမှာတော့ KIA နဲ့ KPDF တွေရဲ့ ပြင်းထန်တဲ့ တိုက်ခိုက်မှုတွေ ကြုံတွေ့ရပါတော့တယ် ။
ရွှေကူမြို့ကနေ ဗန်းမော်မြို့ကို ဆန်တက်လာတဲ့ စစ်ကောင်စီသင်္ဘောတွေဟာ စက်တင်ဘာ ၁၇ ရက်မှာဧရာဝတီမြစ် ဒုတိယမြစ်ကျဥ်းရောက်ခါနီး တိုက်ခိုက်ခံရလို့ အထိနာပြီး ပြန်ဆုတ်ခဲ့ရပါတယ် ။ စစ်ကောင်စီသင်္ဘော (၈) စီးကို ရဟတ်ယာဥ်တွေကလုံခြုံရေးယူပေးထားတဲ့ကြားကပဲ KIA နဲ့ PDF တွေရဲ့တိုက်ခိုက်မှုကြောင့် ဇင်းဘုံရွာအနီး မြစ်ကျဥ်းကိုမ ကျော်နိုင်ပဲ ရွှေကူဘက်ကို ပြန်ဆုတ်သွားရပါတယ် ။
ရွှေကူဘက်ပြန်ဆုတ်လာတဲ့ရေယာဥ်တွေကို စစ်ကောင်စီက ကမ်းကပ်မခံပဲ ဗန်မော်ရောက်အောင် ထပ်သွားခိုင်းတာမှာ ထပ်မံတိုက်ခိုက်ခံခဲ့ရပြန်ပါတယ် ။
"မြစ်ကြောင်းတလျှောက် စောင့်ပြီး တိုက်တာ။ တကယ့်မြစ်ကြောင်းတိုက်ပွဲပဲ။ ညဘက်တွေဆို လှေတွေနဲ့ ကပ်ဆော်တာ။ တော်တော်လေးကို ပွဲကြီးတယ်ဗျ။ ကိုယ့်ဘက်ကလည်း ဒရုန်းနဲ့ ဆော်တယ်။ တစ်ချက်တည်း ၁၂ ယောက်အထိ သေတာရှိတယ်။ စစ်တပ်ကလည်းလေကြောင်းကနေလာပစ်တယ်။ အခုတော့ တစ်စီးပဲ ဗန်းမော်ကိုရောက်သွားတယ်"ဟု ပြည်သူ့ကာကွယ်ရေးရဲတပ်ဖွဲ့ဝင်တစ်ဦးက ဧရာဝတီမြစ်အတွင်းရေကြောင်းတိုက်ပွဲကို ပြောပြပါတယ်။
ခဲယမ်းရိက္ခာတွေတင်ဆောင်ထားတဲ့ဖလက်သံခွန်သင်္ဘောအားလုံးကိုပစ်ခတ်ဖျက်စီးနိုင်ခဲ့တာဖြစ်ပြီး၁ စီးပဲ ဗန်းမော်ကိုရောက်ရှိတယ်လို့ ကချင်စစ်ရေးသတင်းရင်းမြစ်တစ်ဦးကလည်း ပြောပါတယ်။
စစ်ရေယာဥ်၂စီးကို ပစ်ခတ်နှစ်မြှုပ်နိုင်ခဲ့သလို ၊၄စီးကို တိုက်ခိုက်ဖျက်ဆီးနိုင်ခဲ့တာလို့ သိရပါတယ် ။
" ချောဆွဲတဲ့ စစ်လှေကြီးတစ်စီးက အဲဒီ စစ်သင်္ဘောကိုဆွဲသွားတာပေါ့နော။ အဲဒီတစ်စီးပဲဗန်းမော်ရောက်တာ။ များသောအားဖြင့် စစ်လက်နက်ခဲယမ်းတွေသော်လည်းကောင်း စားသောက်ကုန်တွေ သယ်ဆောင်လာတဲ့ သင်္ဘောကတော့ များသောအားဖြင့်ပျက်စီးသွားတယ်ကြားတယ်။ ဗန်းမော်မှာ ဝင်တဲ့ တစ်စီးက ဘာသယ်ထားလဲ အတိအကျ မသိဘူးတဲ့” လို့ စစ်ရေးသတင်းရင်းမြစ်ကပြောပါတယ်။
ရေယာဉ်တွေနဲ့အတူ သယ်ဆောင်လာခဲ့တဲ့ လက်နက်ခဲယမ်းတွေရေထဲမြောပါ နစ်မြုပ်ခဲ့သလို စစ်ကောင်စီတပ်ဖွဲ့ဝင်အချို့ ရေထဲ ခုန်ချ ထွက်ပြေးသွားတယ်လို့ သိရပါတယ်။ တိုက်ခိုက်ခံရစဥ် ရေယာဉ်တွေပေါ်မှာသေဆုံးခဲ့တဲ့ စစ်သားတွေရှိသလို ၊စစ်ကောင်စီတပ်ဖွဲ့ဝင်အချို့ကို အရှင်ဖမ်းမိထားတယ်လို့လည်း ကချင်စစ်ရေးသတင်းရင်းမြစ်တစ်ဦးကပြောပါတယ်
KIA နဲ့ PDF တွေ ရဲ့ဧရာ၀တီမြစ်ကြောင်းတလျှောက် ကြားဖြတ်တိုက်ခိုက်ခဲ့တာကြောင့် ထိခိုက်ပျက်စီးနေတဲ့ ရေယာဉ်တွေရဲ့ ရုပ်သံမှတ်တမ်း စက်တင်ဘာ ၂၀ရက်မှာတော့ စစ်ရေးသတင်းရင်းမြစ်အချို့ လူမှုကွန်ရက်မှာ စတင်ဖော်ပြ ခဲ့ပါတယ်။ စစ်သင်္ဘောတွေ မီးလောင်နေတာ ၊စစ် သင်္ဘောတွေကို တော်လှန်ရေးတပ်တွေက သိမ်းဆည်းနိုင်ခဲ့တာတွေကို ရုပ်သံမှာထင်ထင်ရှားရှားတွေ့ရပါတယ် ။
ဒါကြောင့် ရခိုင်ပြည်နယ်က ရကြောင်းတိုက်ပွဲမှာ အာရက္ခတပ်တော် (AA)ကို စစ်ရှုံးနေတဲ့ စစ်ကောင်စီတပ်ဟာ ဧရာဝတီမြစ်ကြောင်းတိုက်ပွဲမှာ KIA နဲ့ PDF တွေကို ထပ်မံစစ်ရှုံးခဲ့တာဖြစ်ပါတယ် ။
စစ်ရေယာဥ်တွေပေါ်က နေ ခဲယမ်းနဲ့ရိက္ခာတွေ သိမ်းဆည်းရရှိတာ ရှိ ၊မရှိကိုတော့ KIA ကမထုတ်ပြန်သေးပါဘူး။
#ludunwayoo #လူထုနွေဦး #NewsUpdate
𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 - [ Ссылка ]
𝗙𝗮𝗰𝗲𝗯𝗼𝗼𝗸 - [ Ссылка ]
𝗪𝗲𝗯𝘀𝗶𝘁𝗲 - [ Ссылка ]
𝗜𝗻𝘀𝘁𝗮𝗴𝗿𝗮𝗺 - [ Ссылка ]
𝗧𝗲𝗹𝗲𝗴𝗿𝗮𝗺 - [ Ссылка ]
