يوم 1 يوليو سنة 1798.. فوجئ أهل اسكندرية ومصر بشكل عام.. بورق بيتوزع على المصريين.. منشورات يعنى.. مكتوب فيها ايه المنشورات دى؟.. مكتوب فيها.. بسم الله الرحمن الرحيم.. لا إله إلا الله.. لا ولد ولا شريك له فى الملك.. أنا نابليون بونابارت وبأعلن إسلامى قدامكم يا مصريين..

أيوه برده.. جاى اسكندرية بجيوشك ليه؟.. جاى تتوب هنا؟.. قالك لأ.. أنا جاى أخلص على المماليك اللى طهقوكم فى عيشتكم.. لا والله يا فندم متشكرين.. سبنا احنا والمماليك نتصافى مع بعض ملكش دعوة.. قالهم استنو بس مليش دعوة ايه.. أصل فى سبب تانى لاحتلالى مصر.. بجد!!!.. خير ان شاء الله؟.. قالك أصل المماليك الوحشين بيأذوا التجار الفرنسيين.. وأنا جاى النهاردة مخصوص علشان أخد حقهم.. فياريت بقى انتوا كمصريين لذاذ تقفوا معايا ضد المماليك الوحشين وتساعدونى أحتل بلدكم..

أيوه برده انت عندك مشكله مع المماليك.. مصر ذنبها ايه علشان تحتلها.. وأنا مالى يا لمبى؟.. وهنا حضرتك سيدى المواطن بتقدر تدرك ان نابليون مكنش داخل مصر لا علشان يعلن إسلامه.. ولا علشان المماليك مزعلينه.. هو كان داخل مصر علشان يحولها لقاعدة عسكرية يقدر من خلالها انه يغزو الشرق.. الشام وايران وأفغانستان والمنطقة اللى هناك دى.. ومن الناحية التانية يقاسم الإمبراطورية البريطانية فى احتلال العالم.. فى الوقت ده كانت بريطانيا وفرنسا بس هما اللى على الساحة.. أمريكا لسه مكنلهاش صوت زى دلوقتى..

حضرتك تقولى حلو.. لكن ده ايه علاقته بإمبابه وشبرا وبولاق .. احنا ايه اللى ركبنا الأتوبيس؟.. هقولك.. مبدئيا كده نابليون مكنش بيفكر يغزو مصر ولا كانت على باله أصلا.. هو كان عاوز يغزو بريطانيا.. لكن سأل نفسه سؤال.. هو أنا ليه أغامر بغزو بريطانيا اللى ممكن تهزمنى وأخسر كل حاجه.. فى حين إنى ممكن مقربلهاش.. لكن فى نفس الوقت.. أقاسمها فى احتلال العالم.. يعنى بدل ما بريطانيا عماله تغزو فى دول العالم.. وتحتل هنا وهناك لوحدها كده بدون منازع.. لأ.. أنا أطلع أحتل معاها وأجمع اللى أقدر عليه من المستعمرات.. بريطانيا مش أحسن منى فى حاجه..

طيب يا عم نابليون هتحتل مين؟.. قالك احنا محتاجين بلد تكون فى نص كوكب الأرض.. علشان نبقى طايلين أى حته فى الكرة الأرضية.. نقدر نتحرك منها لأى مكان احنا عاوزينه.. وفى نفس الوقت.. تكون غنيه بالثروات والموارد علشان نقدر نعتمد عليها فى تموين الجيش بالغذاء والسلاح.. وفى نفس الوقت.. تكون فى مكان نقدر من خلاله اننا نضايق بريطانيا فى تحركاتها.. ونمنعها من احتلال دول جديدة.. طيب فين البلد دى ياترى؟.. مسك خريطة العالم.. وفضل يدور يدور.. لحد ما شاور على نص الخريطة وقام قايل هى البلد دى.. مصر.. ماسكه بحرين.. البحر المتوسط والبحر الأحمر.. وغنيه فى مواردها.. ولو حولناها لقاعدة عسكرية كبيرة.. نقدر من خلالها اننا نغزو الشرق.. ونمنع تحركات بريطانيا سواء فى البحر المتوسط أو البحر الأحمر.. وكمان هنقدر نمنع استخدامها لطريق رأس الرجاء الصالح وبالتالى تخسر تجارتها.. وهنا نكون ضربناها فى مقتل.. الأهم من كل اللى فات اننا باحتلالنا لمصر.. نقدر ندخل القدس.. وأبقى أنا نابليون بونابرت.. الإمبراطور العظيم اللى قدر يدخل القدس بعد ما انطرد منه كل قادة وملوك أوروبا..

أيوه بس خد تعالا هنا يا نابليون.. انت فاهم ان المصريين هيسيبوك تحتلهم بسهولة كده؟.. هتتصرف معاهم إزاى؟.. قالك بسيطة.. أنا هقنعهم إنى بحبهم وبحترمهم وبحترم الدين الإسلامي.. ولا أقولك.. أنا هقولهم إنى أسلمت.. أشهد أن لا إله إلا الله وأشهد أن محمد رسول الله.. وإنى داخل مصر علشان أخلصهم من حكم المماليك المستبدين.. حلو كده ولا أزود كمان؟.. وهقولهم كمان إن جندى من جنود الدولة العثمانيه.. علشان أضمن إن الخليفة العثمانى ميهاجمنيش ويحاربنى مع البريطانيين.. حلو كده؟.. فالقادة بتوعه قالوله ده كده زى الفل.. اتوكل انت على الله واحنا هنستناك هنا..

وفعلا.. نابليون جهز 36 ألف جندى.. و400 سفينة واتحركوا من ميناء طولون يوم 19 مايو سنة 1798.. مين يعرف؟.. الجيش البريطانى.. فيقوم يعمل ايه؟.. يبعت أسطوله بقيادة هوراشيو نيلسون ورا نابليون علشان يصطاده ويغرقه.. وبالمناسبة هوراشيو نيلسون ده كان واحد من أهم قادة الأسطول البريطانى.. وكان مشهور جدا بتكتيكاته العسكرية.. زى ما هنشوف اللى عمله فى الأسطول الفرنسي كمان شويه.. المهم يطلع الأسطول البريطانى يدور على نابليون.. ومن كتر ما الأسطول البريطانى كان بيجرى فى المايه علشان يلحق نابليون.. وصلوا اسكندرية قبل ما نابليون نفسه يوصل.. وصلوا يوم 28 يونيو.. فيعمل ايه الأسطول البريطانى؟.. قام طالب من محمد كريم.. حاكم اسكندرية وقتها.. إنه يقف بأسطوله على شواطئ اسكندرية علشان يشترى المؤن اللى محتاجها.. لكن محمد كريم رفض.. قالك بريطانيا أكيد جايه تحتل مصر وبيضحكوا عليا.. فالقائد الانجليزى نيلسون حاول يفهمه ان نابليون فى طريقه لمصر علشان يحتلها.. وان الأسطول البريطانى مستنى نابليون علشان يدمرله أسطوله.. لكن برده محمد كريم رفض يسمح للأسطول الانجليزى انه يقرب من شواطئ اسكندرية..

من المصادر
كتاب عجائب الآثار للجبرتى
كتاب جرائم نابليون للكاتب محمد صلاح الدين


#المواطن_سعيد #الحملة_الفرنسية

свернуть