Dünyanın ən böyük canlısı I Göy balina I Heyvanlar aləmi

Flora və faunası çox zəngin olan dünya okeanı bir sıra nəhəng canlıya ev sahibliyi edir. Onlardan ən böyüyü, eləcə də indiyədək dünyada mövcud olan ən böyük heyvan olan göy balina da məhz okean sularında yaşayır.

İndiyədək Dünyada mövcud olan ən böyük heyvan göy balina hətta nəhəng dinozavrların ölçüsünü də geridə qoyur. Qravitasiya qurudakı canlılara təsir edib onların skeletlerinə daha ağır çəkini qaldırmaq imkanı vermədiyi üçün qurudakı heyvanlar o qədər də böyüyə bilmir. Göy balinalar suda olduqları və daha çox suyun səthinə yaxın üzdükləri üçün bədənləri çox böyük ölçülərə gəlib çata bilir. Bu nəhəng canlının çəkisi 200 ton, uzunluğu 30-32 metr-ə qədər uzana bilir. Daha aydın olması üçün qeyd edim ki, bu orta ölçülü 3 avtobus uzunluğuna bərabərdir. Çəkidə isə boeing 757-dən də ağırdır. Göy balinanın təkcə dili fil boydadır. Yəqin ki, bu məlumatlarla bu nəhəng heyvanın təxmini ölçülərini təsəvvür edə bildiniz.

Suyun altında göy rəngdə görünən Göy balinalar əslində göy rəngə çalan boz rəngdədirlər. Dişiləri erkəklərindən böyükdür. Ümumiyyətlə isə Cənub yarımkürəsindəki göy balinalar şimaldakılara nisbətən daha böyük olur. Böyük enli başları var. Bədənlərinin aşağısı sarımtıl rəngə çalır çünki üstlərində milyonlarla mikroorqanizmlər yaşayır.

Tək və ya kiçik qruplar halında olurlar. İsti aylarda qütblərdə yaşayan göy balinalar qışda cütləşmək üçün ekvatora tərəf üz tuturlar. Çox gözəl üzgüçü olan göy balinalar adətən saatda 20km sürətlə üzürlər. Lakin təqib edildikdə və ya qorxduqda sürətləri saatda 50 kmə qədər çata bilir. Qidalanarkən sürətlərini saatda 5km-ə qədər azaldırlar.

Göy balinalar əsasən xərçəngkimilərə aid olan evfauzidlər və ya krill adlanan su heyvanları ilə qidalanır. Bir yetkin göy balina günə 4 ton qida qəbul edir. Bəzən bu 8 tona qədər çata bilir.
Göy balinalar təbiətdə ən yüksək səsə malik heyvanlardandır. Onların səsi 1600 km uzaqlıqdan da eşidilə bilir. Onların səsi təyyarə mühərrikinin səsindən də gurdur. səslərindən Bir birləri il ünsiyyət qurmaq üçün istifadə edirlər.

Dünyanın ən böyük məməlisi olan Göy balinalar diri bala həyata gətitirirlər. Balalarını bətnlərində daşıma müddəti 11-12 ay çəkir. Dişilər iki-üç ildən bir balalayır və 1 bala dünyaya gətirir. Hətta doğularkən kiçik vaxtlarından balaları belə dünyanın ən böyük varlıqları arasında yer alır. Artıq ana bətnindən göy balinalar 3 ton çəki və 7-8 metr uzunluğunda olur. İlk ilində hər gün 90 kq ana südü ilə qidalanır.

Eyni zamanda göy balinalar dünyada ən çox yaşayan heyvanlar sırasındadır. Göy balinaların yaşını qulağındakı muma bənzər maddədər müəyyən etmək mümkündür. Hər 6 aydan bir qulaqlarındakı bu maddə artır. Hesablamalara əsasən, göy balinalar 80-90 il ömür sürürlər. Lakin indiyə kimi hesablanan ən yaşlı göy balina 110 il yaşamışdır.

Hal-hazırda nəsli tükənməkdə olan heyvanlar sırasındadır. 1900-cü illər göy balina yağı axtarışında olan bir sıra qurumlar tərəinfən 360 minə qədər göy balinanın həyatına son qoyulmuşdur. 1966-cı ildən Beynəlxalq Göy balina Komissiyası tərəifindən qoruma altındadır. Lakin təbiətdə akulalar, vəhşi balinalar, və böyük gəmilər tərəfindən də həyatlarına son qoyulur. Beynəlxalq Təbiətin və təbii sərvətlərin mühafizəsi birliyinin açıqlamasına əsasən Hal-hazırda təxminən 10min – 25min arası göy balina mövcuddur.

#heyvanlar #heyvanlaralemi #balina #goybalina #mavibalina #melumat #infomotiaz

свернуть