AsekoseNews-Ընտրություններից հետո վստահության քվե ստանալուց հետո մեծ թափով ձեռնամուխ ենք լինելու բուհական համակարգի զարգացմանը: Այս մասին Դիլիջանում մեկնարկած հանրահավաքի ժամանակ հայտարարեց վարչապետի պաշտոնակատար, «Իմ քայլը» դաշինքը գլխավորող Նիկոլ Փաշինյանը:

«Առաջիկա մեր խնդիրը երկրում սոցիալ-տնտեսական հեղափոխություն իրականացնելն է: Դիլիջանը մեր պատկերացրած մոդելում շատ կարևոր տեղ ունի: Սխալված չեմ լինի, եթե ասեմ, որ այսօր Դիլիջանն ամենաարագ փոխվող քաղաքներից է: Փոփոխության արագությունն այնքան չէ, որքան կուզենայինք, բայց մարզային այլ քաղաքներն ավելի դանդաղ են փոխվում»,- նշեց Ն. Փաշինյանը:

Ըստ նրա՝ Դիլիջանում իրականացվում են բիզնես ծրագրեր, որոնք Հայաստանին նոր կերպար են տալիս: Դրանցից մեկը, ըստ Փաշինյանի, Դիլիջանի միջազգային դպրոցն է:

«Մենք խնդիր ունենք մեր ողջ բուհական համակարգը վերափոխել: Կարևոր է՝ այն կառուցվի այնպես, որ գրավիչ դառնա օտարերկրյա ուսանողների համար: Դիլիջանի դպրոցն ու բժշկական համալսարանն են համապատասխան այդ մոդելին, այնինչ ամբողջ կրթական համակարգը պետք է լինի այդ տրամաբանության մեջ»,- նշեց Նիկոլ Փաշինյանը:

Վարչապետի պաշտոնակատարի խոսքով՝ պատահական չէ, որ բնապահպանական նոր քաղաքականությունը պետք է սկսի իրականացվել Դիլիջանի պարկից: «Երբ ասում ենք, որ բնությունը պետք է պահենք, նկատի չունենք, որ մարդկանց օրվա հացից պիտի սկսենք: Անտառը մարդկանց ավելի մեծ եկամուտ պետք է բերի, քան՝ հիմա: Անտառը նաև ձմեռը տաքանալու խնդիր է լուծում: Մենք այս տարի ավելի քան 50.000 խորանարդ մետր փափուկ փայտ ենք բաժանել ժողովրդին:
Բնությունը և անտառը պահպանելու քաղաքականությունը պետք է շարունակենք»,- հավելեց նա:

Ն. Փաշինյանի խոսքով՝ ժամանակակից տեխնոլոգիաները թույլ են տալիս ծղոտից ստանալ ավելի կալորիական վառելիք, քան փայտը:

«Ես խոսել եմ Կենտրոնական բանկի հետ: Մյուս տարվանից մենք կտրամադրենք վարկային միջոցներ դրա արտադրությունը հիմնողներին: Մենք այդ մարդկանց էժան վարկեր կտանք, եթե ուզեն արտադրել ծղոտից վառելիք: Այդ վառելիքի 1 խորանարդ մետրը 70,000 դրամով է վաճառվում: Ամենաշատը 8 տոկոսանոց վարկեր կտրամադրենք այդ մարդկանց»,- նշեց Նիկոլ Փաշինյանը:

Վարչապետի պաշտոնակատարն ասաց, որ Դիլիջանը պետք է դառնա զբոսաշրջային խոշոր կենտրոններից մեկը:

свернуть