Бу туһунан үөрүүлээх сонун аҕыйах хонуктааҕыта Италия Фолиньо куоратыттан кэлбитэ. Европа түһүлгэтигэр эр дьоҥҥо хаһааҥҥытааҕар да элбэх ытааччы 367 киһи кэлэн кыттыбыт. Бүгүн пресс-конференцияҕа Айаал Макаров ситиһиитин туһунан кэпсээтэ. Федерация аатыттан 200 тыһыынча премия тутта. Кыраҕы харахтаах ытааччы Россия күрэхтэһиитин эрэллээхтик кыайан Европаҕа тиийбит. Санкт-Петербургтан сылдьар тренерэ Кирилл Гончаров бу күрэхтэһиини хайаан да ылабыт диэн бэлэмнээбит. Фолиньо куоракка үс күн иннинэ тиийэн үчүгэйдик сынньанан, дьарыктанан стартка тахсыбыт. Бастакы күн 10 иһигэр сылдьан, 75-тэн 75 тэриэлкэни табан тута лидердэргэ киирбит. Быһаарыылаах күн 200-тэн 199 табан Европа кыайыылааҕынан буолла. Санатан этэр буоллахха, 2013 сыллаахха Айаал Макаров Аан дойду чемпиона аатын сүкпүтэ.
