Соңғы жылдары транзиттік әлеуеті артқан Сыр өңірі сырт елдермен алыс-берісті арттыруға ниетті. Әсіресе, аймақты бойлай өтіп жатқан «Батыс Еуропа – Батыс Қытай» автодәлізі мен «Жезқазған-Бейнеу» теміржолы шартараппен байланысты ширата түсері сөзсіз.
Осы ретте облыста ет кластерін дамыту жолға қойылған. Жергілікті кәсіпкерлер табиғи таза өнімді ішкі нарықтан бөлек, өзге елдерге экспорттауды көздеп отыр.
Бірер күн бұрын Қызылорда облысында ең ауқымды мал бордақылау алаңы ашылды.
21 гектар жерді алып жатқан бұл кешенде бір мезгілде 500 бас ірі қараның күйін келтіруге болады. Инвестициялық жобаның жалпы құны 335 миллион теңге. Оның 70 пайызын «ҚазАгроҚаржы» акционерлік қоғамы қаржыландырса, қалғаны жергілікті кәсіпкер – Мінажаддин Өтеевтің үлесінде.
