Զորացրված սպաները Կառավարության մոտ կոչ արեցին չկոծկել Վայոց ձորի մարզպետարանի աշխատակիցների կողմից ծեծված սպայի գործը: Նրանք պահանջում են մինչև գործի քննության ավարտը կասեցնել Վայոց ձորի մարզպետի լիազորությունները: Զորացրված սպաները վստահ են, որ միջադեպի ժամանակ մարզպետը այնտեղ է եղել:
Սեպտեմբերի 18-ին Եղեգնաձորում ծեծի են ենթարկել ՊՆ փոխգնդապետ Արա Մխիթարյանին, որը տեղափոխվել է ՊՆ Կենտրոնական կլինիկական հոսպիտալի վերակենդանացման բաժանմունք: Այդ արարքի մեջ մեղադրվում է Վայոց ձորի մարզպետի օգնական Հարություն Գրիգորյանը, որը նախօրեին կալանավորվել է: Մամուլի հրապարակումների համաձայն միջադեպին մասնակից է եղել նաև Վայոց Ձորի մարզպետ Տրդատ Սարգսյանը, որը հերքում է իր մասնակցությունը:
Այս գործով մարզպետը որպես վկա հարցաքննվել է: ՔԿ-ի մամուլի ծառայության տարածած հաղորդագրության համաձայն առգրավվել են դեպքի հարակից տարածքի տեսախցիկները՝ մարզպետի մասնակցությունը միջադեպին ստուգելու նպատակով: Փոխգնդապետ Արա Մխիթարյանը հիմա մուրացանի Հոսպիտալում է, որտեղ նրան վիրահատել են գլխին ստացած վնասվածքների պատճառով: Վիճակը բժիշկները գնահատում են ծայրահեղ ծանր:
