Бір тәуліктен бері тоқтамай жер сілкініп жатқан Түркияда жеті күндік ұлттық аза тұту күні жарияланды. Қазірге дейін қаза тапқандардың саны 3 жарым мыңнан асты. Ал зілзаладан жарақаттанғандар тіпті көп. Сол жақта жүрген отандастарымыз Кахраманмараш, Османие мен Газиантепте қазірге дейін 4,5-4,7 балдық дүмпулер жарты сағат сайын болып жатыр дейді. Ал бүгін Қазақстаннан көмек ретінде жіберілген құтқарушылар мен дәрігерлер Газиантепке келіп жетті. Сондай-ақ, сол елде жүрген жерлестеріміз де еріктілер қатарына қосылып, жер сілкінісі қатты болған қалалардың тұрғындарына қолдан келген көмектерін беріп жатыр.
Жойқын жер сілкінісі болған Түркияның бірнеше қаласындағы көрініс жантүршігерлік. Ең алғашқы қатты дүмпудің болғанына бір тәуліктен асты. Бастапқыда 7,4, кейін 7,7 балдық деп хабарланған зілзаланың кесірінен он қалада ғимараттар мен баспаналар жермен жексен болды.
Анкарадағы университетте оқып жүрген отандасымыз Сағыныш Назар қазірге дейін кейбір қалаларда жер асты дүмпулері қайталануда дейді. Айтуынша, әсіресе Кахраманмараш, Османие мен Газиантепте жарты сағат сайын 4,5 балдық дүмпу сезіледі. Сол үшін бірнеше қаладағы көлік қозғалысы 48 сағатқа тоқтатылған. Ал студент өзі тұрып жатқан аймақта зілзаладан ешкім зардап шекпегенін айтады. Сондықтан еріктілер қатарына қосылып, апат болған қалаларға жәрдем ретінде азық-түлік, киім-кешек жіберіп жатырмыз дейді.
САҒЫНЫШ НАЗАР, Анадолы унвиерситетінің студенті:
– Тұрмыстық қажетті заттарды алып, арнайы әкімдік тарапынан құрылған мекемеге өткізіп жатырмыз. Қазірдің өзінде дүкеннен келе жатырмын. Көлікпен тасып жүрмін. Зардап шеккен Қазақстан азаматтары жайлы әзірге ақпарат жоқ.
Ал Мерсин қаласында білім алып жүрген студент Дастан Әлішев кешелі бері қорқыныш құшағында күн кешіп жатырмыз дейді. Айтуынша, әлсін-әлісін сезілетін жер сілкінісінен үрейленген олар ашық алаңдарға барып түнеуге мәжбүр болған.
ДАСТАН ӘЛІШЕВ, Қазақстан азаматы:
– Керек-жарақтың барлығын салып алып, документтерді салып алып кеше от жағып отырдық. Адамдар стадиондарда от жағып отырды. Қасымда 50 шақты Қазақстанның студенті бар. Барлығы аман.
Соңғы мәлімет бойынша, үйіндінің астында қалып көз жұмғандардың саны 3549. Одан бөлек, 22 мыңнан аса жан жарақат алған. Қираған ғимараттарда құтқару жұмыстары мен мәйіттерді іздеу әлі де жалғасуда. Ал бұл қалалаларда 53 мыңдай құтқарушы жұмылдырылған. Сондай-ақ әлемнің түкпір-түкпірінен Түркияға көмек жіберілген. Соның ішінде Қазақстаннан төтенше жағдайлар вице-министрі бастаған құтқарушылар мен дәрігерлер тобы да түс ауа Газиантеп қаласына қонды.
ИБРАГИМ КҮЛШІМБАЕВ, ҚР Төтенше жағдайлар бірінші вице-министрі:
– Осы топта 41 құтқарушылар бар. Оның ішінде біздің дәрігерлеріміз бар. Арнайы қызметтік иттермен осы топтарды жабдықтандырғанбыз. Арнайы самолетқа техникаларды артып, бүкіл керекті құралдарымызды артып алдық.
Түркияда бүгіннен бастап 7 күндік ұлттық аза тұту күні деп белгіленді. Сондай-ақ, Президент Режеп Тайып Ердоған зілзала болған он провинцияға 3 ай бойына төтенше жағдай енгізді. Қазір Түркия билігі алғашқы шұғыл көмек ретінде 5,2 млрд доллар қаражат бөлді. Айта кетейік, қазіргі мәлімет бойынша Түркия мен Сириядағы жер сілкінісінен 5 мыңға жуық адам қайтыс болған.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
