Një marrëveshje përfundimtare me Kosovën, ishte mesazhi i qartë i senatorëve amerikanë, për presidentin e Serbisë Aleksandër Vuçiç. Ata u shprehën se Shtetet e Bashkuara të Amerikës dëshirojnë të krijojnë një hapësirë ku të dyja palët do mund të bien dakord.
Dy ditë pas Kosovës, dy senatorët amerikanë një republikan e një demokrat, sollën atë që në Ballkan mungon, një qëndrim unik. Problemi i Kosovës duhet të zgjidhet me marrëveshje përfundimtare, e cila do të jetë një kompromis. Senatorët Chris Murphy dhe Ron Johnson, thanë se SHBA duan të krijojnë hapësirë brenda së cilës palët do të mund të bien dakord. Kjo do ta bënte edhe Amerikën më të fuqishme dhe mundësi për më shumë partneritet edhe më Serbinë.
“Amerika është mik i Serbisë dhe serbëve. Do të bëjmë çfarë të mundemi që të mbështesim dialogun, gjë që nënkupton se duhet të japësh dhe të marrësh. Sigurisht që nuk do të jetë e kënaqshme për të dy vendet, gjetja e një kompromis. Por kur ai të arrihet, përfitimet do të jenë më të mëdha se problemet”, tha senatori Johnson.
“Shpresojmë që pas zgjedhjeve në Kosovë, të ndërmerren hapat e domosdoshëm për rikthimin në dialog. Jemi këtu për të bërë të qartë, se Amerika, republikanë e demokratë, jemi me Serbinë dhe duam një partneritet me Serbinë. Do të sjellim kolegët tanët për të parë zhvillimin e Serbisë dhe se sa njerëzit duan të jenë miq me Amerikën”, tha senatori Murphy.
Presidenti Vuçiç, si mikpritës ka thënë se e vetmja pikë ku Serbia nuk mund të pajtohet është njohja e pavarësisë së Kosovës pa bërë kompromis. Serbëve u tha që ai nuk do të bëj politikë për marrëdhënie të këqija me SHBA dhe realiteti duhet ditur-presioni më i madh është mbi Serbinë.
“Natyrisht që presioni më i madh do të jetë gjithmonë mbi Serbinë dhe kjo jo vetëm nga SHBA, por edhe nga Bashkimi Europian. Ne bëjmë sikur nuk e dimë çfarë ka ndodhur në vitin 1999 apo në vitin 2008 dhe me vonë kur Kosova fitoi në Gjykatën Ndërkombëtare të Drejtësisë. Por, ne nuk mund ta njohim pavarësinë e Kosovës dhe mund të flasim për gjithçka, por pa kompromis zgjidhje nuk ka”, tha Vuçiç.
Emërimi i një të dërguari për Ballkanin dhe vizitat jo të rralla nga Uashingtoni, kanë bërë që roli i SHBA të shihet sërish si aktiv në këtë pjesë./ABC News Albania 24/7
Ещё видео!