Тұрғындар табиғи газды тұрмыста пайдалануда қарапайым қағидаларды ескере бермейді. Қайғылы оқиғалардың алдын алу үшін «QazaqGazAimaq» акционерлік қоғамы өңірлік филиалының ұйымдастыруымен сала мамандары мен төтеншеліктер бірлесіп, тұрғындарға сақтық шараларын түсіндірді.
«Сәулет» мөлтек ауданының тұрғыны Айнаш Әлиева үйіндегі мына газ пешін 6 жыл бұрын орнатыпты. Қондырғы кінәратсыз жұмыс істеп тұр. Үй жылы, ұйқы да тыныш. «Дегенмен, темірдің аты темір. Сондықтан, жиі тексертіп тұрған артық етпейді», дейді ол.
Мамандар қайғылы жағдайлар көбінесе қарапайым қауіпсіздік ережелерін сақтамағандықтан болады, дейді. Яғни, тұрғындардың жылыту құралдарын пайдалануға немқұрайлы қарауынан, оларды өз бетінше қосып- құрастыруынан, сондай-ақ, қолдан жасалған газ жабдықтарын пайдалануы, тамақ дайындауға арналған газ жабдығымен үй-жайларды жылытуы, техникалық қызмет көрсетуді орындамауы, мұржаның түтін тартуын тексермеуінен туындайды екен.
Осы газ пеші тұрған бөлмені желдетіп отсаңыз дұрыс болар еді. Және де 18 жасқа толмаған балаларыңыз болса газ қазандығына мейлінше жолатпаңыздар. Тамақ істейтін бөлмелеріңізді де ас пісіріп жатқан жағдайда 15-20 минутқа терезені ашып, желдетіп алыңыздар. Қауіпсіздікті сақтасаңыздар дейміз.
АЙБЕК ЕРҒАЛИ - «QAZAQGAZAIMAQ» АҚ ҚӨФ ДИРЕКТОРЫНЫҢ МІНДЕТІН АТҚАРУШЫ
Қазіргі уақытта облыс бойынша 141 мың тұтынушымыз бар. Енді қысқы маусым басталғалы тұрғындармен тығыз байланыс орнатып, аудан мен ауыл, қаладағы ықшам аудандарды аралап, түсіндірме жұмыстарын жүргізіп жатырмыз. Әсіресе, мұржаларын тексерген абзал. Өйткені, жазда құстар оның ішіне ұя салып тастауы мүмкін. Қыста жылуды қосқанда ол жанып, түтін сыртқа шыға алмай, улы газ қайта ішке ұруы мүмкін. Бұл өте қауіпті. Осы ережелерді ескертіп жүрміз.
Сондай-ақ, мамандардың айтуынша, төтенше жағдайлардың алдын алу үшін тұншықтырғыш газды анықтайтын құрылғы орнатқан жөн. Ал, түсіндірме жұмыстары алдағы уақытта да жалғасады.
Сайт - [ Ссылка ]
Facebook - [ Ссылка ]
Instagram - [ Ссылка ]
Telegram - [ Ссылка ]
Tiktok -[ Ссылка ]
