Azərbaycanda kiber təhlükəsizliyi təmin etmək üçün bir sıra işlər görülür. Bunu Nəqliyyat, Rabitə və Yüksək Texnologiyalar nazirinin müavini Elmir Vəlizadə “Kibertəhlükəsizlik konfransı”nda deyib. Onun sözlərinə görə, Azərbaycanda kibertəhlükəsizlik strategiyası təsdiqlənəndən sonra bu sahə daha da genişlənəcək.
Konfransda qeyd olunub ki, Azərbaycanda Fiber-optik, LTE şəbəkəsi genişlənir. “5G”yə keçid üzrə hazırlıq işləri aparılır, sınaq keçirilir.
Konfrans dövlət-özəl əməkdaşlığı çərçivəsində sahə üzrə ümumilikdə 30-dan çox qurum, müəssisə və təşkilatın tərəfdaşlığı ilə baş tutub. “Kibertəhlükəsizlik konfransı”nın əsas məqsədi bu sahədə yerli və beynəlxalq ekspertlərlə birgə təcrübə mübadiləsinin aparılması, bu sahədə fəaliyyət göstərən şirkətlər arasında əməkdaşlığın gücləndirilməsidir.
Kibertəhlükəsizlik konfransı çərçivəsində sual-cavab sessiyaları, ikitərəfli və çoxtərəfli görüşlər baş tutub. Konfransla paralel olaraq 15 yerli və beynəlxalq şirkətin kibertəhlükəsizlik üzrə həllərinin nümayiş etdirildiyi “Cyber Village” sərgisi keçirilib. 2-ci Beynəlxalq “Kibertəhlükəsizlik həftəsi” martın 6-a kimi davam edəcək.
