Նախօրեին հոդված էր հրապարակվել այն մասին, որ Հայաստանում գտնվող Պոլսո Հայոց պատրիարքի տեղապահ Գարեգին արքեպիսկոպոս Բեքչյանը, խոսելով պատրիարքի առաջիկա ընտրության մասին, նաև անուններ է հրապարակել: Արքեպիսկոպոսը նախ ներկայացրել է, թե ովքեր կարող են լինել պատրիարքի թեկնածու, ապա թվարկել այս պահին որպես թեկնածու համարվող եկեղեցականների անուններ: «Այդպիսի մի յոթ-ութ հոգի կան: Խաժակ Սրբազանը կարող է լինել, Նավասարդ Սրբազանի հայրն էլ պոլսեցի է, ծագման առումով ինքն էլ իրավունք ունի առաջադրվելու: Միքայել Սրբազանի հայրն էլ Թուրքիայում է ծնվել՝ Կիլիկիայում: Երուսաղեմի Սեւան Սրբազանի հայրն էլ Թուրքիայում է ծնվել, էլի անուններ կան, թող գան, ես ոչ մի խնդիր չունեմ: Աստված թող տնօրինի», - ասել էր Բեքչյանը: Շիրակի թեմի առաջնորդ Միքայել եպիսկոպոս Աջապահյանը, «Օրագիծ» լրատվականի հետ զրույցում անդրադառնալով իր հնարավոր թեկնածությանը, նշել է, թե իբրև հոգևորական միշտ էլ պատրաստ է եղել ծառայելու ցանկացած տեղ, ցանկացած հանգամանքում: Թեմակալ առաջնորդն ընդգծել է՝ չկա այնպիսի մի պատասխանատվություն, որից խուսափի, եթե եկեղեցին դա հարմար է գտնում:
