Елбасы Нұрсұлтан Назарбаев Білім және ғылым министрін қабылдады. Ерлан Сағадиев Президентке өткен жылғы жұмыс қорытындыларын баяндады.
Мемлекет басшысы білім мен ғылым жүйесінің Жолдауда айқындалған реформаларды орындауда маңызды рөл атқаратындығын айтты.
Және үш тілде білім беру, цифрлық оқыту әдісіне көшу жұмыстарын жеделдетуді тапсырды.
«Сауатты кадрлар болмаса, елімізде технологиялық жаңғыруды жүзеге асыру мүмкін емес», – деп түйді Президент.
Нұрсұлтан Назарбаев, Қазақстан Республикасының Президенті:
-Кешегі айтқан Жолдау жаңа технологиялық революция, Цифрлы Қазақстан білімді адамдарсыз, мамандарсыз болмайды. Сондықтан негізгі жұмыстар сіздерге байланысты болады. Жастарды оқыту, білім беру, мамандар даярлау. Ол болмаса, ештеңе болмайды. Бұдан бұрын мұндай әңгімені қоюға, мақсатты қоюға мүмкіншілік болған жоқ, адамдар болған жоқ. Қазір де жетіспейді. Бірақ көп жұмыс істеп тастадық. Шетелде оқыттық, өзіміздің университеттер көтерілді, мектептерді үш тілге үйретіп жатырмыз. Соның барлығы жаңадан келе жатқан соң, алдымызға мынадай мақсат қойып отырмыз.
Ерлан Сағадиев, ҚР Білім және ғылым министрі:
-Мен Елбасыға министрліктің атқарып жатқан жұмысы жөнінде есеп бердім. Атап айтқанда, базалық оқулықтарды дайындап, 5 күндік білім беруге көшу сынды ведомствоның жүргізіп жатқан реформасы жөнінде айттым. Елбасы бірқатар нақты тапсырмалар берді. Іске асырып жатқан реформаларды халықпен талқылау керектігін айтты. Біз Елбасының тапсырмасына сай алдағы жұмыс жоспарымызды түземіз.
