اليوم نحنا موجودين بوحدة من أجمل وأرقى المناطق بالعاصمة بيروت
وهي منطقة الحمراء.
هالمنطقة يلي استقطبت على مرّ السنين المثقفين والأدباء والشعراء كانت
بالعهد العثماني منطقة زراعية بإمتياز فيها جلول وبساتين بتمتد لرأس
بيروت وكانت خالية من السكان.
وطرقاتها كانت وعرة والوصول الها ما كان بالامر السهل ابداً.
وبعام 1866 انبنت على أطرافها الجامعة الأميركية وكانت تسمى آنذاك
بالكلية السورية الإنجلية.
ووقتا انبنت هالجامعة أهل بيروت اتعجبوا لأن المنطقة كانت بالنسبة الن
منطقة برية وما حدا بيقصدها وفيا حيوانات مفترسة.
ولكن مع الوقت شكل هالصرح التعليمي عامل جذب قوي لسكان بيروت
ولكل اللبنانينن يلي حابين يتعلموا وبدأ الحراك الديمغرافي يتجه لهالمنطقة
بالذات وللمناطق المجاورة.
وشوي شوي بلشت هالمنطقة تعمر أكتر وأكتر وانبنت فيها البيوت وانشقت
فيها الطرقات وانبنت فيها الأسواق. وصارت وحدة من أهم وأعرق
المناطق الموجودة بالعاصمة بيروت.
وبلشت هالمنطقة تستقطب الكتاب والشعراء والمثقفين من بيروت والعالم
العربي. وصارت تضم اعرق المجلات والصحف كما شكلت عامل جذب
للكتير من الانشطة الديبلوماسية والاقتصادية والفنية والثقافية وشهدت أكبر
دور للسينما والمسرح بتاريخ لبنان.
ومافينا ننسى ايضاً الإذاعة اللبنانية والجامعة اللبنانية بالاضافة للبنك
المركزي يلي عطو هالمنطقة قيمة مضافة.
هالمنطقة متل غيرها من المناطق البيروتية تضررت من الحرب اللبنانية
وتراجع نشاطها الاقتصادي والثقافي والاجتماعي والتربوي لكنها ما
استسلمت ورجعت بالعالم 1992 استقطبت الحفلات والمهرجانات ورجع
سوقها التجاري ينبض من جديد ورجعوا رواد مقاهيها يلي أعادوا الحياة
لهالمنطقة ولشوارعها.
أما بالنسبة لتسيمتها فهناك روايات عديدة منها أنو أمراء من بني الحمراء
يتقدمهم الامير الشيخ محمد الحمراء هني أول من سكنوا هالمنطقة بعد ما
اتوطنوا بباطن بيروت لسنوات طويلة وفي زاوية بوسط بيروت اليوم حد
الجامع العمري الكبير اسمهازاوية الحمراء نسبةً لهالقبيلة يلي إجت من
الأندلس لمصر لبلاد الشام من ثم البقاع فباطن بيروت قبل ما ترجع تنتقل
لهالمنطقة ويلي اتسمت على إسمها. ولليوم اسمها بعدو ما تغير.

إعداد: الدكتور حسان حلاق
تقديم: ربيع ياسين
تصوير خارجي: سيرج ابي غانم
مونتاج: أمير مقصود

Facebook: [ Ссылка ]

Twitter: [ Ссылка ]

Instagram: [ Ссылка ]

свернуть