Қазақстандық ең ірі технологиялық компания – Kaspi.kz Apple, Amazon және Google сияқты әлемге әйгілі инновациялық компаниялар да орналасқан АҚШ-тағы NASDAQ биржасында IPO өткізді. Kaspi.kz-тің IPO-сы өткен жылдың қазан айынан бастап АҚШ-тағы ең ірі және 2024 жылы алғашқылардың бірі болды.
Kaspi.kz-тің негізін қалаушылардың бірі әрі басшысы Михаил Ломтадзе былайша түсіндіріп өтті:
«Нью-Йорктің орталығында Times Square-де жанымызға жақын Қазақстанның үлкен байрағы желбіреп тұрғандағы мақтанышқа толы сезімді сөзбен жеткізу қиын. Сіздермен бірге Қазақстанды жаңа деңгейге көтердік, елімізді инновациялардың әлемдік картасына қойдық және бүкіл әлем бойынша көптеген компаниялар мен инвесторларға үлгі болдық. Kaspi.kz-тің дамуының жаңа кезеңі басталды. Енді әрқайсыңыз бен еліміздің алдындағы жауапкершілігіміз зор болмақ. Сүйікті клиенттеріміз бен серіктестерімізге бізбен бірге болғаны үшін рақмет айтамыз! Бізді жаңа жетістіктерге шабыттандыра түсіңіздер. Біз өз тарапымыздан өміріңізді жақсартатын инновациялық сервистерді алдағы уақытта да жасай беретінімізге, сөйтіп Қазақстанның дамуына өз үлесімізді қосатынымызға уәде береміз!»
Kaspi.kz негізін қалаушылардың бірі және директорлар кеңесінің төрағасы Вячеслав Ким мынаны ерекше атап өтті:
«Kaspi.kz-тің тарихы Қазақстанмен, елімізде тұратын және жұмыс істейтін адамдармен тығыз байланысты. АҚШ-тағы IPO кезінде біз инвесторларға Қазақстан жайлы және еліміздегі цифрландырудың жетістіктері туралы көп айттық. Көптеген ірі инвесторлар Қазақстанда цифрландырудың керемет жетістіктерін көптен бері бақылап келеді, ол мемлекеттің бастамасымен және қолдауымен жүзеге асырылып жатыр. Kaspi.kz-тің сәтті өткен IPO-сы –халықаралық инвесторлар үшін Қазақстанға және қазақстандық компанияларға инвестиция салудың тағы бір белгісі екеніне сенімдіміз!»
Жаһандық орналастыру бөлімінің бастығы Кэрен Сноу өз сөзінде былай деді:
«Kaspi.kz Қазақстанда Алматыда 17 жыл бұрын құрылған сәттен бастап компания адамдардың өмірін жақсартуды миссиясына айналдырды және цифрландыруға сүбелі үлес қосты.
Үздік Kaspi.kz қосымшасы электрондық коммерция, саяхат, азық-түлік, төлемдер, QR-код бойынша төлем және мемлекеттік қызметтер сервистерін ұсынып, Қазақстандағы адамдардың күнделікті өмірінің бір бөлігіне айналды, оның әлемдегі басқа да танымал қосымшалармен салыстырғанда ең жоғары қатыстылық көрсеткіштері бар.
Командаңызды құттықтаймыз. NASDAQ Kaspi.kz-тің серіктесі болғанын мақтан тұтады және АҚШ-та толыққанды IPO өткізген Қазақстаннан келген тұңғыш компанияны қошеметпен қарсы алады».
Kaspi.kz туралы
Kaspi.kz-тің миссиясы – сүйікті клиенттердің өмірін жақсартатын инновациялық өнімдер мен сервистер жасау. Компания инновациясының түпқазығы – бұл шамамен 14 миллион адам пайдаланатын қайталанбас әрі еліміздегі ең танымал үздік Kaspi.kz мобильді қосымшасы. Үздік Kaspi.kz мобильді қосымшасының көмегімен қазақстандықтар төлем жасап, ақша аударады, өз қаржысын басқарады, жеткізу қызметінің көмегімен заттарды тиімді онлайн сатып алады, мемлекеттік қызметтерді алады және басқа да көптеген күнделікті міндеттерді шешеді.
