" تخونوه و عمره ما خانكم .. " 🖤

عارفين الأغنية دي كانت في الأصل بتاعة مين ؟ كانت أغنية الست ليلى مراد ..
بليغ حمدي كان صديق لـ عبدالحليم و مرة و هما قاعدين سوا بليغ قاله انا عامل أغنية لـ ليلى مراد و سمع حليم جزء منها .. الأغنية عجبت عبدالحليم ، و طلب من بليغ انه يتوسطله عن الست ليلى مراد عشان تتنازل عن الاغنية و يغني هو الأغنية ، بليغ قاله دي سجلت أول مقطع منها خلاص ، قاله معلش كلمها بردو يمكن توافق ، حليم كان لسه في بدايته ، مطرب صغير ، و الست ليلى اسم كبير .. و بالفعل راح بليغ لـ الست ليلى و بلغها اللي حصل ، و كان رد الست ليلى مفاجأة .. بعتتله رساله مكتوب فيها بالنص :

" الفنان الجميل صاحب الصوت المميز عبدالحليم حافظ لقد حضر عندي الشاب الملحن بليغ حمدي وقد طلب منى التنازل عن غنوة تخونوه علشان تغنيها في فيلمك الجديد ( الوسادة الخالية) على حد علمي ، و على فكرة الموضوع كان مفاجأة لي لأني قمت فعلاً بتسجيل الجزء الأول من الغنوة هذا أولاً ، ثانيًا الأستاذ إسماعيل الحبروك لابد له من الموافقة يعنى الموضوع مش خاص بي و لكن هناك عدة أطراف وهناك شركة اسطوانات والعقد المتفق عليه بيني و بينهم ولكن على فكرة أنا موافقة من ناحيتي أنا ، المهم الأستاذ إسماعيل الحبروك ، أنا هحاول أن أوضح له الأمر وأنا هكون سعيدة بتقديم أي شيء يكون سبب في نجاحك يا عبدالحليم أنا سوف أتنازل عن أي حقوق مادية أو قانونية خاصة بي وطبعًا أنا عارفة إن بليغ موافق لأنه هو اللي عرض عليا الموضوع ، و بليغ قال إنه في غاية الحرج منى علشان الغنوة ، وإنه جاء بناء على طلبك أنت ، وعلى فكرة أنا سعيدة جدًا بهذا الطلب منك ، أنا غنيت كتير جدًا يا عبدالحليم وأنا دائماً أحب أن أرى نجاح الشباب و أحب دائما الوقوف إلى جانبهم و خاصة أنت لأن ظروفك في البداية زى ظروفي ، وأنا وجدت التشجيع من الأستاذ عبد الوهاب و قد تعلمت منه أن أقف مع الشيء الجميل وأكون سبب فيه لأن الحاجة الحلوة سوف تظهر على الساحة بينا أو بغيرنا آسفة طولت عليك ، المهم أنا يا سيدي زى ما قولت موافقة و سوف أكلم الأستاذ إسماعيل الحبروك و سوف أقول له إن وجود الأغنية في فيلم سوف يكون أفضل من أسطوانة وإن شاء الله سوف يوافق "

و بالفعل اتنازلت ليلى عن الاغنية و غناها حليم .. احنا فين من الرقي و التسامح ده ؟! 🖤
#اخبار #أخبار_الفن_والمشاهير #اخبار_الفنانيين #النجومية #اخر_الاخبار #الجمهور

свернуть