Бір жарым айдан соң «Экспо-2017» көрмесіне қойылатын үздік жобалар тізімі анықталады.

Халықаралық 7 сарапшының сынынан өткен баламалы энергетика саласындағы стартап жобалар кейін көрмеге қойылады.

Бүгін Елордада «Болашақ энергиясы» форумынан шыға журналистерге сұхбат берген Энергетика министрі Қанат Бозымбаев осылай деді.

Байқауға мыңнан астам инновациялық жұмыс ұсынылса, 30-ы іріктеліп, көрмеге келген халыққа, инвесторларға таныстырылмақ. Бұл – инновациялық мәдениетті қалыптастырып, инвестициялық климатты жақсартуға бағытталып отырған бастама.

Сондай-ақ Қазақстан «Форсайт-2050» жоспарын құруда. Онда отандық және әлемге әйгілі энергетиктері мен футурологтары болашақтың баламалы қуат көзі қандай болатынын зерттемек.

«Экспо» аяқталған соң Қазақстанның жылу-энергетикалық кешен тұжырымдамасы да өзгертілмек.

Қанат Бозымбаев, ҚР Энергетика министрі

-Энергиямен не болады? Қай тараптан энергияны аламыз? Қай энергияны пайдаланатын боламыз? Атом энергиясын ба, мұнай энергиясын ала береміз бе, көмірді жағып, түтін иіскеп, отыра береміз бе? Жел, су, күн энергиясы ма? Дүние жүзінде жалпы қандай тенденциялар, соның бәрін зерттеп, біз үлкен бір жобаны көрмеміз ашылғанда, елге паш ететін боламыз, көрсетеміз.

свернуть