Мәмин бірнеше рет тапсырма берсе де Қазақстан нарығындағы әлеуметтік маңызы бар азық-түлік бағасының шарықтауы тоқтар емес. Өткен жылдың жазынан бері үкімет тұрақтандыру қорларына миллиондаған қаражат жұмсаған. Бірақ нарықта айтарлықтай нәтиже байқалған жоқ. Соған қарамастан үкімет бұл қаражаттың көлемін тағы да ұлғайтпақшы. Дегенмен экономистер шенеуніктердің мұндай әрекеті бос әурешілік деп отыр.
Жыл басталғаннан бері Қазақстанда азық-түлік бағасы тағы 2,6 пайызға қымбаттаған. Бұл сандарды үкімет жарияламаса да халық біліп, дүкенге барған сайын көріп те жүр. Алайда Бақыт Сұлтанов сұйық май мен қант сырттан келетіндіктен баға шарықтап тұр дейді. Ал жұмыртқаның удай болып кеткені құс тұмауының кесірінен екен.
БАҚЫТ СҰЛТАНОВ, ҚР Сауда және интеграция министрі:
– Бағаларды тұрақтандыру бойынша жол картасы әзірленді. Құжат 44 нақты шарадан тұрады. Мемлекеттік органдар тарапынан бағаны негізсіз көтерген нарық субъектілеріне бақылауды күшейтуге бағытталған. Әкімдіктер сауда саясатын іске асыру, бақылау функцияларын күшейту. Шекті бағаларды белгілеу, нарық субъектілерімен шарттар жасасу, айналым схемасын ұлғайту. Одан бөлек экспортталатын тауарларға квота енгізу.
Үкімет министрліктерге бағаны тұрақтандыру бойынша тағы тапсырма берді. Тұрақтандыру қорларына бөлінетін қаражат көлемі тағы ұлғайтылмақ. Алайда бұл жұмыстардың да айтарлықтай нәтиже беретініне көпшілік сенбейді.
Экономистер әлеуметтік маңызы бар азық-түлік бағасын тұрақтандыру мүмкін емес дейді. Өйткені Еуразиялық экономикалық одақ аясындағы елдердегі нарық бағаларды бір-бірінен қайталайды. Сондықтан бағаны ұстап тұру мүмкін емес, ол өсе береді екен.
БАУЫРЖАН ТОЛЫСБАЕВ, Экономика ғылымдарының докторы:
– Әлеуметтік аз қамтылған, зейнет жасындағы, мектеп жасындағы оқушылар дұрыс тамақтану керек. Міне осы салаға міндетті түрде адресный көмек жасауы керек. Қолжетімді бағамен адресно. Бізде бірнеше магазин ашып қойды. Шапағат. Бірақ оған халықтың бәрі келіп алады ғой.
Экономистер азық-түлік бағасын реттеу үшін барлық тауар елімізде өндірілуі керек дейді. Ал Қазақстан әзірге сыртқы нарыққа тәуелді. Сондықтан бағаны тұрақтандыру тек қиялдағы арман дейді мамандар. Ауыл шаруашылығы министрі де тауар бағасын ұстап тұруға белсене кіріспек. Ол әлеуметтік маңызы бар азық-түлік өндірушілеріне мемлекет көмегін ұсынып, тіпті, субсидияны да арттырамыз деп отыр.
Гүлназ Сайлауқызы, Нұркен Тоқмурзин
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#баға #азық_түлік #нарық
