Президент Қасым-Жомарт Тоқаев әлеуметтік маңызы бар азық-түлік өнімдерінің бағасын қымбаттатпауды жергілікті билікке шегелеп тапсырса да, кейбір әкімдер бұған бас қатырмайтын сияқты. Өйткені жаңа жыл басталғалы еліміздің бірнеше өңірінде жеміс пен көкөніс өнімдері қымбаттаған. Ал солтүстікте ет тапшылығының туындауы бағаның өсуіне әкеп соқты. Информбюро тілшілері базарларға барып, бағаны өз көздерімен көріп келген еді.
РУСЛАН ЖАСҰЛАНҰЛЫ, тілші:
– Солтүстікте еттің бағасы тағы қымбаттаған. Небәрі жыл басталған 19 күні ішінде қой мен сиыр етінің бағасы 100 теңгеге өскен. Жылқы еті 200 теңгеге көтерілген. Қазір қаладағы базарлардың өзінде қой мен сиыр етінің бағасы 2500 теңгеге дейін барады. Ал жылқы етінің бір келісі үш мың теңгеден асқан. Сатушылардың сөзінше, елде ет тапшылығы бағаға кері әсер еткен.
БАЯН АБЫКОВА, сатушы:
– Потому что ауылда уже ет жоқ. Бүкілін нетіп жатыр ғой. Кормить ауылда нечем. Шөп жоқ. Менің сестренкам ауылда тұрады. Шөбі жоқ, корм жоқ. Бүкілін сойып тапсырып жатыр. Бір сиыр ғана ұстайды.
РУСЛАН ЖАСҰЛАНҰЛЫ, тілші:
– Сатушылардың сөзінше, ет қымбат болған соң жылдан жылға сауда да азайып барады дейді. Өйткені еттің бағасы қалта көтермейтіндіктен көпшілік тауық етіне көшкен.
Ал Шымкентте есесіне еттің бағасы біршама арзандаған. Бірақ сатып алушы жоқ. Саудагерлер базар сөрелерінде жылқы, сиыр, қой еттері 100 теңгеге төмен түсті дейді. Өйткені өнімге сұраныс болмағандықтан, бағаны арзандатуға тура келіпті. Қазір сауда сөрелерінде қой еті 2400 теңгеден сатылуда. Сиыр еті 2500 теңге болса, жылқы өнімі 2700 теңгеге тұрақтаған. Ал сиырдың сүйексіз еті 3000 теңгеден саудаланса, жылқының сүйексіз еті 3200 теңгеден сатылып жатыр. Ал қазы 3500 теңге төңірегінде.
ҒАЗИЗА АЙДАРБЕКОВА, сатушы:
– Төмендеді баға 100 теңгеге төмендеді. Алымсақ жоқ. Сауда жай болып жатыр. Жаңа жылдан кейін жылда сол, сауда жай болып жатыр.
Расымен базарларда сауда жасап жүрген елдің қарасы аз. Сатушылар қазір күніне шамамен 100 келі ғана ет сатады екен. Ал былтыр жыл соңындағы мерекелердің қарсаңында күнделікті 500 келі мал өнімін саудалапты.
Атырауда көкөніс, жеміс-жидек бағасы күннен күнге қымбаттап жатыр. Облыс халқы қала орталығындағы үлкен базарда жүрген тұрғындар бағаның сан құбылатынына наразы. Қазір мұнда картоп бағасы 240 теңге, сәбіз 200-300 теңге, пияз 120-130 теңге аралығында сатылып жатыр. Бұл жаңа жылдың алдындағы бағамен салыстырғанда 15-20 теңгеге қымбат. Мұндай қымбатшылықтан қиналған тұрғындар тамақты түйірлеп алып жүрміз деп налиды.
Айта кету керек, сарапшылардың мәліметінше еліміздің бірқатар өңірінде 5-ші және 11 қаңтар аралығында әлеуметтік маңызы бар азық-түліктің өзінің, яғни қарақұмық, күріш, шекер, тіпті тұздың бағасына дейін өскен.
Жанат Молдашова, Мақсат Жақсыбайұлы, Руслан Жасұланұлы
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#азық_түлік #қымбатшылық
