"YAŞAT" Fondunun Azərbaycanın ərazi bütövlüyünün bərpası uğrunda yaralananların və şəhid ailələri ilə görüşləri təşkil olunur. Artıq fondun əməkdaşları bu kateqoriyadan olan insanların yaşadıqları ünvanlara üz tutmağa başlayıblar. Bütün şəhid ailələrinin yaşadıqları ünvanlar müəyyənləşdirilib, yaralananlarla bağlı siyahılar üzrə işlər isə yaxın günlərdə tam yekunlaşacaq. Bundan əlavə Fondun “Çağrı” Mərkəzi və elektron platforması qısa zamanda istifadəyə veriləcək.
Fondun əməkdaşları şəhid ailələrinin üzvləri və qazilərimizdən seçilib. Eyni zamanda ASAN könüllüləri də şəhid ailələrinin qayğılarının öyrənilməsində fəal iştirak edir. Bu günə qədər “YAŞAT" Fondu üçün həyata keçirilmiş ianələrin məbləği 10 milyon manatdan çoxdur. Fondun fəaliyyəti çərçivəsində müvafiq kateqoriyadan olan şəxslərin ehtiyacları yaxın müddətdə qarşılanacaq. Qeyd edək ki, Prezident İlham Əliyevin Fərmanı ilə Azərbaycanın ərazi bütövlüyü uğrunda döyüşlərdə yaralananların və şəhid ailələrinin sosial təminatına dəstək olaraq "YAŞAT" Fondu yaradılıb. Fondun manat, dollar , avro və rubl hesabları var. İstənilən şəxs bu hesablara vəsait köçürə, həmçinin bu vəsaitin hara sərf olunmasını izləyə bilər. Fondun himayəçilik şurasına ziyalılar, tanınmış elm, mədəniyyət xadimləri, şəhid ailəsinin üzvü və qazilər daxildir. Qurumun əməkdaşları da qazilər və şəhid ailələrinin üzvləridir. “YAŞAT” Fondunun sərəncamçısı Vətəndaşlara Xidmət və Sosial İnnovasiyalar üzrə Dövlət Agentliyi təyin olunub.
