Жалпы санасы уланған жандардан төнетін қауіптің қандай болатынын сіз бен біз білеміз. Айдың күні аманда лаң салып, Ақтөбені дүрліктіргендерді көрдік. Бүгін сол қанды оқиға жөніндегі іс бойынша соттың алдын ала тыңдау күні белгіленді.
Іс Ақтөбе облыстық қылмыстық істер бойынша мамандандырылған ауданаралық сотта қаралады. Алдын ала тыңдау 18 қазанда ашық түрде өтеді. Бұл іс бойынша барлығы 29 адам жауапқа тартылып отыр. Тоғызы – терактіге тікелей қатысқандар. 18-і қылмысқа дайындық барысын біле тұра, тиісті орындарға ақпарат бермеген. Тағы екі күдікті қылмыскерлерді жасырған.
Естеріңізге салайық, 5 маусымда болған теракт кезінде 7 адам қаза тапқан еді. Үшеуі – бейбіт тұрғын. Тағы отыз адам жараланды. 14-і – қала тұрғындары. Арнайы операция кезінде 18 лаңкестің көзі жойылып, 9-ы ұсталған болатын.
Илиада Досова, Ақтөбе облыстық соты ақпараттық бөлімі бастығының міндетін атқарушы
-Қылмыстық іс 201 томнан тұрады. Сотталушылардың мүддесін 27 адвокат қорғайды. Қылмыстық іс бойынша 48 куә, 88 жәбірленуші тартылған.
