:: شيلة المزن ::
كلمات : سعود بن حادي
أداء : سعود الدلبحي
مونتاج : أبو تركي

يالله ياللي تسوق المزن يالوالي = يا عالم بالسماء والي جرى فيها
يالواحد اللي يبدل كل الاحوالي = يا خالق النفس يا عالم خوافيها

انك من الغرب تنشي مزن وخيالي = وان نجد بأمرك يارب البيت تجريها
مع اول الوسم مزنن كنه جبالي = خيل على نجد قاصيها ودانيها

البرق يبرق وخير المزن همالي = والاوديه جتك فاضية(ن) عواليها
جاء يدحم سيلها من الجال للجالي = امطار رحمة وبينة(ن) مواريها

والعشب الاخضر نبت من كل الاشكالي = والباذر انبت ووجه الارض غاطيها
والطير لامن سمعته غرد يلالي = تطرب لها النفس ولحونه تسليها

وشوف الحيا والاباعر يشرح البالي = ذود(ن) مغاتير والفكس آر قافيها
وخوة نشامى ضروا قطع الخلا الخالي = هي سلعة(ن) بين بايعها وشاريها

جهمة عقب ما نصلى الصبح طوالي = قدم العصافير تظهر من مرابيها
العزبه محمله والجيب شغالي = والجيب الاخر نحمل فيه باقيها

ثم انتهضنا واخذنا الخط في الحالي = نمشي معه لين ديرتنا تعديها
ثم انهزع بر مثل مسابق الرالي = وقصايد شقير بالكنود تغنيها

ونجي لنا عبلة(ن) خضرا تحلوالي = ربله ورقروق والنوار غاطيها
وننزل بها في محل مرتفع عالي = وننفض تيازير خيمتنا ونبنيها

والنار يشعم حطبها معرب الخالي = وله المعاميل والرسلان ندنيها
ويسوى الكيف مر(ن) كايف(ن) حالي = برية(ن) من ثلاث اصناف ناقيها

لامن تقهويت منها بس فنجالي = تقعد لك الراس ما مل متقهويها
وسوالف(ن) وافيات قصار وطوالي = تقال لامن حصل شيئ(ن) يطريها

وان مرنا بالنهار طيور(ن) اجوالي = نظهر لها الشوزن ونلحق ونرميها
الجو غيم وصيد الطيب الفالي = انعام ما بين طابخها وشاويها

هذي ترى دعوتي يالله الوالي = دعوة فقير(ن) رفع كفه لمحييها

свернуть