@voaofficial. #news #newstatus #newsupdate #breakingnews

اسرائیلی فوج کی غزہ پر بمباری، شہید فلسطینیوں کی تعداد 3700 سے تجاوز
غزہ میں ہزار سال پرانے گریک آرتھوڈوکس چرچ پر بھی حملہ، متعدد افراد زخمی
فلسطینی مزاحتمی تحریک حماس اور اسرائیل کے درمیان جاری جنگ کے دوران غزہ پر اسرائیلی فضائیہ کی بمباری کے نتیجے میں شہید ہونے والے فلسطینیوں کی تعداد 3700 سے تجاوز کر گئی ہے۔

عرب میڈیا رپورٹس کے مطابق غزہ پر اسرائیل کی بمباری سے جمعرات کی شام تک 24 گھنٹوں کے دوران مزید 307 فلسطینی شہید ہوئے۔

اقوام متحدہ

اقوام متحدہ کی رپورٹ کے مطابق 7 اکتوبر کو شروع ہونے والی لڑائی کے بعد سے اب تک اسرائیلی حملوں میں شہید ہونے والے فلسطینیوں کی تعداد 3,785 ہو گئی ہے جن میں کم از کم ایک ہزار 524 بچے اور ایک ہزار 444 خواتین بھی شامل ہیں۔

فلسطینی وزارت صحت کے مطابق اسرائیلی حملوں میں زخمی ہونے والے افراد کی تعداد 12500 تک پہنچ چکی ہے۔

گریک چرچ پر حملہ

اسرائیلی فضائیہ کی جانب سے غزہ میں ہزار سال پرانے گریک آرتھوڈوکس چرچ کو بھی نشانہ بنایا گیا جس کے نتیجے میں وہاں پناہ لینے والے متعدد افراد زخمی ہوگئے جبکہ چرچ کے کچھ حصے منہدم ہوگئے۔چرچ کے نگران فلسطینی مسیحی ابراہیم جحشاں نے بتایا کہ جب دھماکا ہوا تو وہ وہاں موجود تھے اور اپنے خاندان کے ساتھ وہاں پناہ لیے ہوئے تھے۔

انہوں نے کہا کہ بہت سے مسلمان بھی علاقے میں اپنے گھروں سے فرار ہونے کے بعد چرچ میں پناہ لے رہے تھے۔ان کا مزید کہنا تھا کہ ہم جنگ نہیں چاہتے، ہم امن چاہتے ہیں، غزہ میں مقیم مسلمانوں اور عیسائیوں کے لئے دعا کریں۔

فلسطنییوں کی گرفتاریاں

اسرائیلی فوج نے مقبوضہ مغربی کنارے کے شہر رام اللہ میں ایک کارروائی کے دوران 14 فلسطینیوں کو گرفتار بھی کیا ہے۔

فلسطینی خبر رساں ایجنسی وفا نے ام صفا ویلج کونسل کے سربراہ مروان صباح کے حوالے سے بتایا ہے کہ اسرائیلی فورسز نے علاقے میں رہائشیوں کی گاڑیوں اور گھروں پر براہ راست گولہ باری بھی کی۔

7 اکتوبر سے اب تک اسرائیلی فورسز کی جانب سے 850 سے زائد گرفتاریاں کی جا چکی ہیں۔

جنوبی غزہ

جنوبی غزہ میں شہید ہونے والوں کی تعداد 21 تک پہنچ گئی ہے جبکہ زخمیوں کی تعداد 79 ہو گئی ہے۔فلسطینی خبر رساں ایجنسی وفا کا کہنا ہے کہ خان یونس شہر میں شہید ہونے والوں میں زیادہ تر خواتین اور بچے شامل ہیں جبکہ اسرائیلی حملے میں ایک ہی خاندان کے آٹھ افراد بھی شہید ہوئے ہیں۔

свернуть